“பயங்கரவாதிகளுக்கு தகுந்த பதிலடி நிச்சயம்” – ‘மன் கி பாத்’ நிகழ்ச்சியில் பிரதமர் மோடி

புதுடெல்லி: இந்தியாவுடன் மோத துணியும் பயங்கரவாதிகளுக்கு தகுந்த பதிலடி அளிக்கப்படும் என்று பிரதமர் நரேந்திர மோடி தெரிவித்துள்ளார்.

138-வது ‘மன் கி பாத்’ நிகழ்ச்சியில் பேசிய பிரதமர் மோடி, பாலக்கோட் தாக்குதல் முதல் ஆபரேஷன் சிந்தூர் வரையிலான இந்தியாவின் பயங்கரவாத எதிர்ப்பு நடவடிக்கைகளை குறிப்பிட்டார்.

2016-ம் ஆண்டு செப்டம்பர் 28 மற்றும் 29-ம் தேதிகளில் இந்திய ராணுவம் பாகிஸ்தான் ஆக்கிரமிப்பு பகுதியில் உள்ள பயங்கரவாத முகாம்களுக்கு எதிராக நடத்திய சர்ஜிக்கல் ஸ்டிரைக்கின் 10-வது ஆண்டு நிறைவை முன்னிட்டு அவர் பேசினார்.

இந்தியா பயங்கரவாதத்துக்கு எதிராக “பூஜ்ஜிய சகிப்புத்தன்மை” கொள்கையை பின்பற்றுவதாகவும் பிரதமர் கூறினார்.

9/11 தாக்குதல் நினைவு

அமெரிக்காவில் நடைபெற்ற 9/11 பயங்கரவாத தாக்குதலுக்கு 25 ஆண்டுகள் நிறைவடைவதையும் பிரதமர் நினைவுகூர்ந்தார்.

உலக வர்த்தக மைய தாக்குதலில் உயிரிழந்தவர்களில் அமெரிக்கர்களுக்கு அடுத்தபடியாக இந்தியர்களின் எண்ணிக்கையும் குறிப்பிடத்தக்கதாக இருந்ததாக அவர் கூறினார். உயிரிழந்தவர்களின் குடும்பங்களுக்கு இரங்கலும் தெரிவித்தார்.

சோமநாதர் – மொதேரா வரலாறு

இந்தியாவின் வரலாற்று பாரம்பரியம் குறித்தும் பிரதமர் விரிவாக பேசினார்.

சோமநாதர் கோவில் மற்றும் குஜராத்தின் மொதேரா சூரியக்கோவில் தொடர்பான வரலாற்று நிகழ்வுகளை குறிப்பிட்ட அவர், மொதேரா இன்று சூரிய ஆற்றலை அடிப்படையாகக் கொண்ட ‘சூரிய கிராமம்’ என்ற புதிய அடையாளத்தையும் பெற்றுள்ளதாக கூறினார்.

தமிழ்நாட்டின் திருச்சி மாவட்டம் மணப்பாறையில் பழமையான சிற்பங்கள் மற்றும் கோவில்களை கண்டறிந்து ஆவணப்படுத்தும் பணியில் ஈடுபட்டு வரும் செல்வராஜுவையும் பிரதமர் பாராட்டினார்.

ஒரு மாணவர் தெரிவித்த தகவலை அடிப்படையாகக் கொண்டு கள ஆய்வு மேற்கொண்டு, பல்வேறு பழமையான சிற்பங்கள் மற்றும் கோவில் அமைப்புகளை அவர் கண்டறிந்ததாக பிரதமர் குறிப்பிட்டார்.