சென்னை : 2025-26-ம் நிதியாண்டுக்கான தமிழக வேளாண் பட்ஜெட்டை சட்டப்பேரவையில் விவசாயிகள் நலன் மற்றும் வேளாண்மைத் துறை அமைச்சர் எம்.ஆர்.கே. பன்னீர்செல்வம் இன்று காலை தாக்கல் செய்தார். சட்டப்பேரவைக்கு வெளியே எதிர்க்கட்சித் தலைவர் எடப்பாடி பழனிசாமி செய்தியாளர்களைச் சந்தித்தார். அவர் கூறியதாவது:- இன்று 5-வது முறையாக விவசாய பட்ஜெட் தாக்கல் செய்யப்பட்டுள்ளது.
கடந்த 4 ஆண்டுகளாக வழங்கப்பட்ட நிதிநிலை அறிக்கையைப் போலவே, இந்த ஆண்டும் அவை தொடர்ந்து முன்வைக்கப்பட்டுள்ளன. விவசாயிகளை ஏமாற்றுவதில் தி.மு.க.வினர் வல்லவர்கள் என்பதற்கு இதுவே சரியான உதாரணம். விவசாயத்துக்கென தனி பட்ஜெட் தாக்கல் செய்தால் தாங்கள் வளர்ந்து வளம் பெற்று வளமான வாழ்க்கை வாழலாம் என விவசாயிகள் கனவு கண்டனர். ஆனால் அது போலியானது என்பது தற்போது நிரூபணமாகியுள்ளது.
விவசாய பட்ஜெட்டை விவசாய பட்ஜெட் என்ற பெயரில் கிட்டத்தட்ட 1.45 மணி நேரம் படித்து சாதனை படைத்துள்ளனர். அதுதான் தமிழக விவசாய பட்ஜெட்டின் சாதனை. இந்த விவசாய பட்ஜெட்டில் விவசாயிகளுக்கு எந்த பலனும் இல்லை. அவர்களுக்கு கிடைத்ததெல்லாம் ஏமாற்றம்தான். வேளாண் துறை சார்ந்த ஊரக வளர்ச்சித் துறை, பட்டு வளர்ச்சித் துறை, கால்நடைத் துறை, பால்வளத் துறை, கூட்டுறவுத் துறை, மீன்வளத் துறை, வருவாய்த் துறை, தொழில்துறை, மின்சாரத் துறை, நீர்வளத் துறை என அனைத்துத் துறைகளையும் இணைத்து விவசாய பட்ஜெட் தாக்கல் செய்யப்பட்டுள்ளது.
இந்த விவசாய பட்ஜெட்டில் விவசாயிகளுக்கு பயனளிக்கும் திட்டமோ, பலனோ இல்லை. அதிமுக ஆட்சியில் உணவு பதப்படுத்தும் பூங்கா, உழவர் உற்பத்தி குழுக்கள் போன்ற திட்டங்களை திமுக அரசு கைவிட்டது. இந்த ஆண்டு ஒரு சில இடங்களில் அவை அறிவிக்கப்பட்டுள்ளன. கடந்த 4 ஆண்டுகளாக பட்ஜெட்டில் அவை இடம்பெறவில்லை. முளைக்காத விதைகள், பயனற்ற உயிர் உரங்கள் என மோசடிக்கு வழி வகுக்கும் திட்டங்களைத் தவிர, இந்த பட்ஜெட்டில் விவசாயிகளுக்கு பயனளிக்கும் திட்டம் எதுவும் இல்லை. ரூ.100 கோடி ஒதுக்கீடு அறிவிப்பு.
இயற்கை விவசாயம் என்ற துறைக்கு 100 கோடி ரூபாய் வழங்குவது அனைத்தும் நிறுத்தப்பட்டுள்ளது. கலைஞர் அனைத்து கிராம ஒருங்கிணைந்த வேளாண் வளர்ச்சித் திட்டம் என்ற திட்டத்தை அறிவித்தார். இதில் ஏற்கனவே அ.தி.மு.க ஆட்சியில் கொண்டு வரப்பட்டு செயல்படுத்தப்பட்ட திட்டங்களும் அடங்கும். இதனால் விவசாயிகளுக்கு கூடுதல் பலன் இல்லை. தமிழகத்தில் கூடுதலாக 11.75 லட்சம் ஹெக்டேரில் சாகுபடி செய்யப்படும் என்றும், தற்போதுள்ள சாகுபடி பரப்பு 60 சதவீதத்தில் இருந்து 75 சதவீதமாக விரிவுபடுத்தப்படும் என்றும் அறிவித்திருந்தனர்.
ஆனால், அந்த வகையில் சாகுபடி பரப்பளவு அதிகரிக்கப்படவில்லை. 2021-22-ல், மொத்த சாகுபடி பரப்பளவு 63.48 லட்சம் ஹெக்டேர், அதாவது 48.7%. ஆனால் சாகுபடி பரப்பு 49.08 லட்சம் ஹெக்டேர் மட்டுமே, அதாவது 37.7%. 2023-24-ல், சாகுபடி பரப்பு கிட்டத்தட்ட 1.2% குறைந்துள்ளது. திமுக ஆட்சியில் ஒவ்வொரு ஆண்டும் சாகுபடி பரப்பு குறைந்து கொண்டே வருகிறது. 10 லட்சம் ஹெக்டேர் பரப்பளவில் இரு பருவ சாகுபடி நிலத்தை பத்து ஆண்டுகளில் இரட்டிப்பாக்குவோம் என்று கூறினர், ஆனால் அதுவும் நடக்கவில்லை. 2021-22-ல், ஒருமுறைக்கு மேல் சாகுபடி செய்யப்பட்ட பரப்பளவு சுமார் 14.39 லட்சம் ஹெக்டேர்.
அதே 2023-24-ல் 13.6 லட்சமாக குறைந்துள்ளது. எனவே, தமிழகத்தில் இருபருவ சாகுபடி பரப்பளவு அதிகரிக்கவில்லை, அதிகரிக்க திட்டம் இல்லை. இதுதான் எதார்த்தமான உண்மை. தென்னை, பருத்தி, சூரியகாந்தி போன்ற பணப்பயிர்களுக்கு விவசாய உற்பத்தியில் தமிழகத்தை முதல் மூன்று இடங்களுக்கு கொண்டு வருவோம் என்றார். இந்த பயிர்களின் உற்பத்தித்திறன் ஒவ்வொரு ஆண்டும் குறைந்து வருகிறது. 2021-22-ல் நெல் உற்பத்தி திறன் ஹெக்டேருக்கு 3,566 கிலோவாக இருந்தது.
2023-24-ல் 3,354 கிலோவாக குறைந்துள்ளது. பருத்தி உற்பத்தி திறன் 2019-20-ல் ஹெக்டேருக்கு 419 கிலோவாக இருந்தது, 2023-24-ல் 312 கிலோவாக குறைந்துள்ளது. கரும்பு உற்பத்தி திறன் ஹெக்டேருக்கு 108 டன்னாக இருந்தது, 2023-24-ல் 105 டன்னாக குறைந்துள்ளது. மொத்த நெல் உற்பத்தி 79.06 லட்சம் டன்னாக இருந்தது, 2023-24ல் 70.48 லட்சம் டன்னாக குறைந்துள்ளது. பயிர் உற்பத்தி 4.98 லட்சம் டன்னாக இருந்தது, 2023-24-ல் 3.86 லட்சம் டன்னாக குறைந்துள்ளது.
இந்த தகவல்கள் அனைத்தும் தமிழ்நாடு புள்ளியியல் துறையிடம் இருந்து எடுக்கப்பட்டது. விவசாயிகளுக்கு பயனுள்ள எந்த திட்டத்தையும் இந்த அரசு செயல்படுத்தவில்லை. விவசாயிகளுக்கு உற்பத்திக்கான இடுபொருட்கள் கிடைக்கவில்லை. தரமான விதைகள் கிடைப்பதில்லை, அரசு தருவதில்லை. பயிர் சேதத்தை கட்டுப்படுத்த அரசு எந்த நடவடிக்கையும் எடுக்கவில்லை. பயிர் இழப்பீடு கிடைக்கவில்லை. குறுவை சாகுபடி தொடர்ந்து 3 ஆண்டுகளாக பயிர் காப்பீடு திட்டத்தில் சேர்க்கப்படவில்லை,” என்றார்.
