கள்ளக்குறிச்சி: திண்டிவனம் அருகே தைலாபுரம் எஸ்டேட்டில் நேற்று ராமதாஸ் நிருபர்களிடம் கூறியதாவது:- ஸ்காட்லாந்து போலீசாருக்கு இணையாக கருதப்பட்ட தமிழக போலீஸ் துறை, முதல்வரின் கையாலாகாத செயலால் முற்றிலும் தன் செயல்பாடுகளை இழந்துள்ளது. வேங்கைவாயல் விவகாரம், நெல்லை காங்கிரஸ் தலைவர் ஜெயக்குமார் கொலை, திருப்பூர் பல்லடம் பகுதியில் ஒரே குடும்பத்தைச் சேர்ந்த 3 பேர் படுகொலை என பல சம்பவங்களில் உண்மையான குற்றவாளிகள் அடையாளம் காணப்படவில்லை.
காவல் துறையின் ஆய்வுக் கூட்டங்களை முதல்வர் நடத்தி, சட்டம் ஒழுங்கைப் பாதுகாப்பதிலும் கூடுதல் கவனம் செலுத்த வேண்டும். காவல் துறை சுதந்திரமாக செயல்பட அனுமதிக்க வேண்டும். சட்ட விரோதமாக செயல்படும் மதுக்கடைகளை கண்டறிந்து மூட வேண்டும். தங்களின் தவறுகளையும், தோல்விகளையும் மறைப்பதற்காக ஜனநாயகப் போராட்டங்களில் ஈடுபடுபவர்களை கைது செய்து அடக்குமுறைக்கு உட்படுத்துவதாக ஆளும் திமுக அரசு குற்றம் சாட்டுகிறது.
அரசு பள்ளிகளை மேம்படுத்த தனியார் பள்ளிகளின் உதவியை நாடும் முடிவை அரசு கைவிட வேண்டும். அரசுப் பள்ளிகளின் வளர்ச்சிக்கு தனி ஆணையம் அமைத்து முன்னாள் மாணவர்கள், வணிகர்கள், தொண்டு நிறுவனங்களிடம் நிதி பெறுவதில் தவறில்லை. ஆனால், அரசுப் பள்ளிகளை தனியாரிடம் ஒப்படைத்து, அதில் பணிபுரியும் ஆசிரியர்களை தனியார் நிர்வாகத்தில் பணிபுரிய வற்புறுத்துவதை ஏற்க முடியாது. நகர்ப்புற உள்ளாட்சி அமைப்புகளுடன் 400 கிராம பஞ்சாயத்துகள் இணைக்கப்பட உள்ளதாக தகவல் வெளியாகியுள்ளது.
இதற்கு கிராம மக்கள் மத்தியில் எதிர்ப்பு கிளம்பியுள்ளது. நகர்ப்புற விரிவாக்கம் என்ற பெயரில் நகர உள்ளாட்சி அமைப்புகளுடன் கிராம பஞ்சாயத்துகளை இணைக்கக் கூடாது. பாமக பொதுக்குழு கூட்டத்தில் அறிவிக்கப்பட்டபடி, அக்கட்சியின் இளைஞர் அணி தலைவராக முகுந்தன் செயல்படுவார். அவருக்கு முறையாக பணி நியமன கடிதம் வழங்கப்பட்டுள்ளது. அவரது நியமனத்தில் எந்த மாற்றமும் இல்லை. அதே சமயம் அன்புமணியுடன் எந்த பிரச்சனையும் இல்லை, கருத்து வேறுபாடும் இல்லை. வன்னியர் மக்களுக்கு 10.5 சதவீத இடஒதுக்கீடு கிடைக்கும் வரை எங்களது போராட்டம் தொடரும் என்றார்.
