விழுப்புரம்: விழுப்புரம் மாவட்டம், விக்கிரவாண்டி அருகே உள்ள வி.சாலையில், ‘வெற்றி கொள்கை திருவிழா‘ என்ற பெயரில், தமிழக வெற்றிக் கழகத்தின் முதல் மாநாடு இன்று மாலை நடக்கிறது. மாநாட்டில் 100 அடி கம்பத்தில் கட்சிக் கொடியை ஏற்றி வைத்து அக்கட்சியின் தலைவர் விஜய் பேச உள்ளார். இந்த மாநாட்டிற்காக தமிழகம் மற்றும் புதுச்சேரியில் இருந்து கட்சி நிர்வாகிகள், தொண்டர்கள், பொதுமக்கள் நேற்று இரவு முதல் மாநாட்டு அரங்கிற்கு வரத் தொடங்கினர்.
காலை 6 மணிக்கே ஆயிரக்கணக்கானோர் திரண்டனர். காலை 7 மணி முதல் மாநாட்டு மைதானத்தில் அமைக்கப்பட்டிருந்த 3 முக்கிய நுழைவு வாயில்கள் வழியாக அனுமதிக்கப்பட்டனர். இதில் 30 வயதுக்குட்பட்ட இளைஞர்கள் ஏராளமானோர் கலந்து கொண்டனர். இதில் ஏராளமான இளம்பெண்களும் கலந்து கொண்டனர்.
பெரும்பாலும் அரசியல் கட்சி மாநாடுகளில் நீண்ட தூரத்தில் இருந்து வாகனங்களில் வரும் ஏராளமான ஆண்கள் கலந்து கொள்கின்றனர். ஆனால் விஜய்யின் தவெக மாநாட்டிற்கு பல இளம் பெண்கள் வந்தனர். இதனால், பகல் 12 மணிக்கு மாநாட்டு அரங்கில் இருந்த 55 ஆயிரத்துக்கும் மேற்பட்ட இருக்கைகள் நிரம்பின. இந்த மாநாட்டில் பங்கேற்க திருச்சி, சென்னை மற்றும் வடக்கு, தெற்கு மாவட்டங்களில் இருந்து ஆயிரக்கணக்கான தொண்டர்கள் அதிகாலை முதலே கார், வேன், பேருந்துகளில் குவிந்தனர்.
இதனால் விழுப்புரம், திண்டிவனம் பகுதிகளில் இருந்து வரும் வாகனங்கள் காலை முதல் சென்னை-திருச்சி தேசிய நெடுஞ்சாலையில் தொடர்ந்து அணிவகுத்துச் சென்றன. விக்கிரவாண்டி டோல்கேட் பகுதியில் தொண்டர்கள் அதிகளவில் வாகனங்கள் வந்ததால் காலை 10 மணி முதல் போக்குவரத்து நெரிசல் ஏற்பட்டது. விக்கிரவாண்டி டோல்கேட் முதல் சித்தாணியை அடுத்த வி.ரோடு வரை சுமார் 4 கி.மீ., தூரம் வரை தவெக மாநாட்டு வாகனங்கள் தொடர்ந்து வருவதால் போக்குவரத்து நெரிசல் ஏற்பட்டு சாலையின் இருபுறமும் வாகனங்கள் அணிவகுத்து நின்றன.
பகல் 12 மணி வரை சென்னை-திருச்சி தேசிய நெடுஞ்சாலை வாகனங்கள் மாற்று சாலையில் திருப்பி விடப்படாததால், சென்னை, திருச்சி நோக்கி செல்லும் வாகனங்கள் ஊர்ந்து சென்றன. இதனால், பொதுமக்கள் மற்றும் பயணிகள் அவதியடைந்தனர். மாநாட்டின் திடல் பகுதியில் போக்குவரத்துக்கு இடையூறு ஏற்படாமல் இருக்கவும், மாநாட்டுக்கு வந்தவர்களை பாதுகாப்பாக அனுப்பவும் சாலையின் இருபுறமும் இரும்பு தடுப்புகள் அமைக்கப்பட்டன.
தன்னார்வலர்களின் வசதிக்காக 350 நடமாடும் கழிப்பறைகள், 22 ஆம்புலன்ஸ்கள், 18 மருத்துவக் குழுக்கள், 5 வாகன நிறுத்துமிடங்கள் அமைக்கப்பட்டு வாகனங்கள் நிறுத்த ஏற்பாடுகள் செய்யப்பட்டுள்ளன. மாநாடு நடைபெறும் இடத்தில் QR குறியீடு ஸ்கேனிங் வசதியும் ஏற்படுத்தப்பட்டுள்ளது. குறிப்பாக தர்மபுரி மாவட்டம் பாலக்கோடு அருகே உள்ள 13 கிராமங்களில் கிராமத்திற்கு ஒரு பேருந்து என 13 பேருந்துகளில் விஜய் ரசிகர்கள் மாநாட்டை பார்வையிட்டுள்ளனர்.
தேனி மாவட்டம் உசிலம்பட்டியில் இருந்து கட்சி தொண்டர்கள் வந்து பான், கேஸ் ஸ்டவ், சிலிண்டர் வைத்து பிரியாணி தயாரித்து உணவு விநியோகம் செய்து வருகின்றனர். தருமபுரியில் இருந்து புறப்பட்ட தொண்டர்கள் 3 வேலைகளையும் தயார் செய்து சாப்பிட்டுவிட்டு மாநாட்டை பார்வையிட்டுள்ளனர்.
முகத்தில் கட்சி சாயம் பூசி கோஷமிட்டனர். மாநாட்டு மையத்தைச் சுற்றியுள்ள சிறிய கடைகளில் பாட்டில் தண்ணீர், ஐஸ்கிரீம், சிப்ஸ், சிகரெட் மற்றும் பிற பொருட்கள் விற்கப்படுகின்றன. மாநாட்டு மைதானத்தில் மதியம் 12.30 மணி வரை சுமார் 1 லட்சம் பேர் குவிந்துள்ளதாக தெரிவிக்கப்பட்டுள்ளதால் வடக்கு மண்டல ஐஜி அஸ்ரா கர்க் தலைமையில் 4000 போலீசார் பாதுகாப்பு பணியில் ஈடுபடுத்தப்பட்டுள்ளனர்.
