அமெரிக்காவின் அரிசோனா மாநில பல்கலைக்கழகத்தின் இந்திய கொள்கை மற்றும் பொருளாதார ஆய்வுகள் கிளப் ஏற்பாடு செய்த நிகழ்வில் இந்திய மாணவர்களிடையே பேசிய பாஜக மூத்த தலைவர் அண்ணாமலை, “அமெரிக்காவின் அரிசோனா மாநில பல்கலைக்கழகத்தில் படிக்கும் அதிர்ஷ்டம் உங்களுக்கு உண்டு. இங்கே நீங்கள் உலகம் முழுவதிலுமிருந்து அறிவைப் பெறலாம். நமது படிப்பின் போது அடுத்த 30 அல்லது 40 வருட வாழ்க்கைக்கு நம்மை தயார்படுத்திக் கொள்வது முக்கியம். இந்தியா வளர்ச்சிப் பாதையில் செல்கிறது.
இந்தத் தொழில் வளர்ந்து வருகிறது. ஸ்டார்ட்அப் துறையில் உலகில் இரண்டாவது இடத்தில் உள்ளோம். அமெரிக்கா, இங்கிலாந்து மற்றும் ஆஸ்திரேலியா உட்பட உலகில் இந்திய மாணவர்கள் முதலிடத்தில் உள்ளனர். 2047-ம் ஆண்டுக்குள், நமக்கு $34 டிரில்லியன் பொருளாதாரம் இருக்கும். நீங்கள் இங்கே நன்றாகப் படிக்க வேண்டும், உங்களை நன்றாகத் தயார்படுத்திக் கொள்ள வேண்டும், நீங்கள் படிக்கும் நாட்டை மதிக்க வேண்டும். இந்த நாடு பலருக்கு வாய்ப்புகளை வழங்குகிறது. நீங்கள் வீடு திரும்பும்போது, இந்தியாவிற்கும் அமெரிக்காவிற்கும் இடையே கலாச்சார தூதர்களாக இருக்க வேண்டும்.
இந்தியாவும் அமெரிக்காவும் உங்களிடமிருந்து அதிகம் எதிர்பார்க்கின்றன. நீங்கள் எங்கிருந்தாலும், என்ன செய்தாலும், உங்கள் ஒரே வீடு இந்தியாதான். உங்கள் வேர்கள் அங்கேதான் உள்ளன. நீங்கள் எப்போதும் அதை நினைவில் கொள்ள வேண்டும். நாளை உங்களுக்கு ஏதேனும் பிரச்சனை ஏற்பட்டால், இந்தியா முதலில் உங்களுக்கு உதவும். நாம் இருக்கும் நாட்டை மதிக்க வேண்டும், அதே நேரத்தில், நம் வேர்களை மறந்துவிடக் கூடாது. காஷ்மீரின் பஹல்காமில் நடந்த பயங்கரவாத தாக்குதல் மிகவும் வருத்தமளிக்கிறது. மும்பை பயங்கரவாத தாக்குதல் நடந்தபோது, நமது உளவுத்துறை வலுவாக இல்லை. ஆனால் இப்போது உளவுத்துறையின் ஒத்துழைப்பு நன்றாக உள்ளது.
எல்லை வழியாக நுழைந்து தாக்குதல் நடத்திய பிறகு பயங்கரவாதிகள் எளிதாக தப்பி ஓடிவிட்டனர். காஷ்மீர் இளைஞர் மாணவர் விசாவில் பாகிஸ்தானுக்குச் சென்று 7 ஆண்டுகளாக நாடு திரும்பவில்லை. பாதுகாப்புப் படையினரால் அவரை சிறிது காலம் மட்டுமே கண்காணிக்க முடிந்தது. அவர் 6 பயங்கரவாதிகளுடன் வந்து தாக்குதலை நடத்தினார். நமது பாதுகாப்புப் படையினரும் அரசியல் தலைவர்களும் இந்தப் பிரச்சினைக்கு ஒரு தீர்வைக் காண்பார்கள். நமது பிரதமர் அவர்களுக்கு சரியான பாடம் கற்பிப்பார்.
ஆயிரக்கணக்கான ஆண்டுகளாக இந்தியாவில் இதுபோன்ற தாக்குதல்கள் உள்நாட்டுப் போராக நடந்து வருகின்றன. இந்தியாவை ஆண்ட பல முகலாய பேரரசர்கள் வாரணாசியில் உள்ள பல இந்து கோயில்களை இடித்துத் தள்ளினர். இந்தப் பிரச்சினை ஒரே நாளில் தீர்க்கப்படாது. இவ்வாறு அண்ணாமலை பேசினார்.
