இந்தாண்டு பொதுத்தேர்வு எழுதும் 25.57 லட்சம் மாணவர்கள்..!!

இந்த ஆண்டு 10, 11 மற்றும் 12-ம் வகுப்புகளுக்கான பொதுத் தேர்வை மாநிலம் முழுவதும் 25.57 லட்சம் மாணவ, மாணவியர் எழுதவுள்ளதாக தேர்வுத்துறை தெரிவித்துள்ளது. தமிழக பள்ளிக் கல்வி பாடத்திட்டத்தில், 10, 11, 12-ம் வகுப்பு படிக்கும் மாணவர்களுக்கு, மார்ச், 3-ம் தேதி முதல், ஏப்., 15-ம் தேதி வரை, பொதுத்தேர்வு நடக்க உள்ளது. இந்நிலையில், பொதுத்தேர்வு தொடர்பாக, மாவட்ட முதன்மை கல்வி அலுவலர்களுடனான ஆலோசனை கூட்டம், அண்ணா நூற்றாண்டு நூலக வளாகத்தில், நேற்று நடந்தது.

பள்ளிக் கல்வித் துறை அமைச்சர் அன்பில் மகேஷ் தலைமையில் நடைபெற்ற கூட்டத்தில், பள்ளிக் கல்வித் துறை செயலர் பி.சந்திரமோகன், தமிழ்நாடு பாடநூல் கழக மேலாண்மை இயக்குநர் பொ.சங்கர், பள்ளிக் கல்வி இயக்குநர் ச.கண்ணப்பன், தேர்வுத் துறை இயக்குநர் ந.லதா, தொடக்கக் கல்வி இயக்குநர் பூ.ஆ.நரேஷ், தனியார் பள்ளி இயக்குநர் மு.பழனிசாமி உள்ளிட்ட பலர் கலந்துகொண்டனர். கூட்டத்தின் முடிவில் பொதுத் தேர்வு எழுதும் மாணவர்களின் விவரம் வெளியிடப்பட்டது.

அதன்படி, பிளஸ் 2 தேர்வை மாணவர்கள் 3 லட்சத்து 78,545 பேர், மாணவிகள் 4 லட்சத்து 24,023 பேர், தனித்தேர்வர்கள் 18,344 பேர், கைதிகள் 145 பேர் என மொத்தம் 8 லட்சத்து 21,057 பேர் எழுதுகின்றனர். பிளஸ் 1 பொதுத் தேர்வில் 389,423 மாணவர்கள், 428,946 மாணவிகள், 4755 தனித்தேர்வர்கள், 137 கைதிகள் என மொத்தம் 823,261 பேர் எழுதவுள்ளனர். 446,411 மாணவர்கள், 440,465 மாணவிகள், 25,888 தனித்தேர்வர்கள், 272 கைதிகள் என மொத்தம் 913,036 மாணவர்கள் 10ஆம் வகுப்பு பொதுத் தேர்வை எழுதவுள்ளனர். 10, 11 மற்றும் 12-ம் வகுப்பு பொதுத் தேர்வில் மொத்தம் 2557,354 மாணவர்கள் தோற்றவுள்ளனர்.

பொதுத்தேர்வுக்காக 11 மற்றும் 12-ம் வகுப்புகளுக்கு 3,316 மையங்களும், 10-ம் வகுப்புக்கு 4,113 மையங்களும் அமைக்கப்படும். இது தவிர, தேர்வு கண்காணிப்பு சிறப்புப் படைகள், தேர்வு அறை கண்காணிப்பாளர்கள் பற்றிய விவரங்களையும் தேர்வுத் துறை வெளியிட்டுள்ளது. இதைத் தொடர்ந்து அமைச்சர் நிருபர்களிடம் கூறியதாவது:- பொதுத் தேர்வுகள் தேர்தலுக்கு சமம். இதனால் பல லட்சம் மாணவர்களின் எதிர்காலம் கேள்விக்குறியாகி உள்ளது. தேர்வுக்கு வரும் மாணவர்கள் பதற்றத்தை தவிர்த்து மகிழ்ச்சியான மனநிலையில் வர வேண்டும். எங்கள் மாணவர்களின் கல்வி நிலை குறித்து தவறான தகவல்கள் வெளியிடப்படுகின்றன. இதற்கு தீர்வாக, 10 லட்சம் மாணவர்களிடம் கணக்கெடுப்பு நடத்தி, விபரங்களை வெளியிட திட்டமிட்டுள்ளோம். இந்த அறிக்கையை மாநில திட்டக்குழு வெளியிடும். அப்போது நம் தமிழக மாணவர்களின் நிலை தெரியும். இவ்வாறு அவர் கூறினார்.