சென்னை: தமிழக சட்டப்பேரவையில் நேற்று சுகாதாரத்துறை அறிவிப்புகளை அமைச்சர் எம்.சுப்பிரமணியன் அறிவித்தார். இதில் அவர் பேசியதாவது: கிண்டியில் உள்ள கலைஞர் நூற்றாண்டு மருத்துவமனை வளாகத்திலும், தஞ்சாவூர் மருத்துவக் கல்லூரி ராசா மிராசுதார் மருத்துவமனையிலும் குழந்தைகளுக்கான உயர் சிறப்பு வாய்ந்த பல்துறை மருத்துவமனை ரூ.250 கோடியில் நிறுவப்படும்.
தமிழ்நாடு டாக்டர் எம்ஜிஆர் மருத்துவப் பல்கலைக்கழகத்தின் கீழ் ரூ.16 கோடியில் 6 மண்டல ஆராய்ச்சி மையங்கள் நிறுவப்படும். ஆரம்பகால புற்றுநோய் சிகிச்சைத் திட்டம் ரூ.27 கோடியில் அனைத்து மாவட்டங்களுக்கும் விரிவுபடுத்தப்படும். மேலும், குழந்தைகளின் வளர்ச்சி மற்றும் நல்வாழ்வை கண்காணிக்க சிறப்பு மையங்கள் இயக்கப்படும். குறைப்பிரசவம் மற்றும் குறைந்த எடையுடன் பிறக்கும் குழந்தைகளை அவர்களின் வீடுகளிலேயே தொழில்நுட்ப உதவியுடன் கண்காணிக்கும் முன்னோடித் திட்டம் 7 மாவட்டங்களில் ரூ.1.28 கோடி செலவில் செயல்படுத்தப்படும்.
சர்க்கரை நோயினால் கால் பாதிப்பை ஆரம்ப நிலையிலேயே கண்டறிந்து, கால் இழப்பை தடுக்க ஒருங்கிணைந்த கால் பராமரிப்பு திட்டம் ரூ.26.62 கோடி செலவில் மாநிலம் முழுவதும் செயல்படுத்தப்படும். 101 கோடி மதிப்பிலான மருத்துவ உபகரணங்கள் மருத்துவமனைகளுக்கு வழங்கப்படும்.
அரிஞ்சர் அண்ணா அரசு இந்திய மருத்துவமனை வளாகத்தில் ரூ.18.13 கோடி மதிப்பீட்டில் கூடுதல் உள்கட்டமைப்பு வசதிகள் ஏற்படுத்தப்படும். மலைவாழ் மக்களுக்கு அவசர மருத்துவ சேவை வழங்க ரூ.1.60 கோடி மதிப்பீட்டில் இருசக்கர வாகன அவசர மருத்துவ வாகனங்கள் வழங்கப்படும்.
நீலகிரி அரசு மருத்துவக் கல்லூரி மருத்துவமனையில் 50 படுக்கைகள் கொண்ட தனியார் வார்டு, மகப்பேறு காத்திருப்பு அறைகள் மற்றும் 4 அரசு ஆரம்ப சுகாதார நிலையங்களில் இதர வசதிகள் ரூ.1.08 கோடியில் ஏற்படுத்தப்படும். போக்குவரத்து துறை டிரைவர்கள், கண்டக்டர்கள் மற்றும் இதர பொது வாகன ஓட்டுநர்களுக்கு விபத்து மற்றும் அவசர காலங்களில் அளிக்கப்படும் உயிர்காக்கும் முதலுதவி பயிற்சி அளிக்கப்படும்.
அனைத்து அரசு மருத்துவக் கல்லூரிகளிலும் “முதியோர் பராமரிப்பு சேவை உதவியாளர்” என்ற புதிய சான்றிதழ் படிப்பு தொடங்கப்படும். ஸ்டான்லி, கோவை மற்றும் மதுரை அரசு மருத்துவக் கல்லூரி மருத்துவமனைகளில் உயிர் காக்கும் எடை குறைப்பு அறுவை சிகிச்சை அளிக்கப்படுகிறது.
ஒவ்வொரு மாவட்டத்திலும் போதை மருந்து மீட்பு மையங்கள் மற்றும் முகாம்கள் மூலம் சமூக அளவிலான விழிப்புணர்வு மற்றும் ஆலோசனை சேவைகள், குழு மற்றும் தனிநபர் மனநல ஆலோசனை, மருந்து மீட்பு சிகிச்சை மற்றும் தகுந்த மறுவாழ்வு சேவைகள் வழங்கப்படும் என மொத்தம் 110 அறிவிப்புகள் வெளியிடப்பட்டுள்ளன.
