சென்னை: எழும்பூர் அரசு குழந்தைகள் நல மருத்துவமனையில் கடந்த 7 ஆண்டுகளில் 2,876 லிட்டர் தாய்ப்பால் தானமாக வழங்கப்பட்டுள்ளது. உலக தாய்ப்பால் வார தொடக்க விழா சென்னை எழும்பூரில் உள்ள அரசு குழந்தைகள் நல மருத்துவமனையில் நேற்று நடந்தது. ‘இடைவெளியைக் குறைத்தல், அனைத்து தாய்மார்களுக்கும் தாய்ப்பால் ஊட்டுதல்’ என்ற தலைப்பில், சுகாதாரத் துறை செயலர் சுப்ரியா சாஹு தலைமை விருந்தினராகக் கலந்து கொண்டு, உலக தாய்ப்பால் வார விழிப்புணர்வு நிகழ்ச்சியைத் தொடங்கி வைத்தார்.
தொடர்ந்து, குழந்தைகள் நல மருத்துவமனைக்கு தாய்ப்பால் வழங்கிய தாய்மார்கள், குழந்தைகள் பிரிவில் சிறப்பாகப் பணியாற்றி வரும் மருத்துவர்கள், செவிலியர்கள், சுகாதாரப் பணியாளர்கள் ஆகியோருக்கு சுப்ரியா சாஹு பாராட்டுச் சான்றிதழ்களை வழங்கினார். அப்போது அவர் கூறியதாவது: உலகளவில் சுமார் 6 லட்சம் குழந்தைகள் போதிய தாய்ப்பால் கிடைக்காததால் உயிரிழந்துள்ளனர். இதில், ஒரு லட்சம் குழந்தைகள் வயிற்றுப்போக்கு மற்றும் நிமோனியாவால் இறந்துள்ளனர்.
குழந்தைகளுக்கு சரியான முறையில் தாய்ப்பால் கொடுத்திருந்தால் இந்த உயிரிழப்புகளைத் தவிர்த்திருக்கலாம் என ஆய்வு ஒன்றில் தெரிவிக்கப்பட்டுள்ளது. அதுமட்டுமின்றி தாய்மார்கள் தாய்ப்பால் கொடுக்காவிட்டால் மார்பக புற்றுநோயால் பாதிக்கப்பட வாய்ப்பு உள்ளது. தாய்மார்களுக்கு பாதிப்பு: அந்த வகையில், தாய்ப்பால் கொடுக்காத 2,000க்கும் மேற்பட்ட தாய்மார்கள் மார்பக புற்றுநோயாலும், 8,000க்கும் மேற்பட்டோர் சர்க்கரை நோயாலும் உயிரிழந்துள்ளனர். எனவே, அனைத்து தாய்மார்களும் தங்கள் குழந்தைகளுக்கு தாய்ப்பால் கொடுப்பதை உறுதி செய்ய வேண்டும். இவ்வாறு அவர் பேசினார்.
குழந்தைகள் நல மருத்துவமனை இயக்குனர் டாக்டர் ரேமசந்திரமோகன் கூறுகையில், ‘எல்லும்பூர் குழந்தைகள் நல மருத்துவமனையில் கடந்த 7 ஆண்டுகளில் 7,151 பேர் 2,876.1 லிட்டர் தாய்ப்பாலை வழங்கியுள்ளனர். 4,947 குழந்தைகளுக்கு 2,459.95 லிட்டர் பெறப்பட்ட தாய்ப்பால் வழங்கப்பட்டுள்ளது என்றார்.
