48 ஆண்டுகளுக்குப் பிறகு மதுரையில் நடைபெற உள்ள திமுக பொதுக்குழு கூட்டம் மிகப்பெரிய அளவில் நடத்தப்படும் வகையில், அமைச்சர் மூர்த்தி தயாரிப்புகளை தீவிரமாக மேற்கொண்டு வருகிறார். ஜூன் 1ஆம் தேதி உத்தங்குடியில் நடைபெறும் கூட்டத்திற்கு முதல்நாள் இரவே முதலமைச்சர் மு.க. ஸ்டாலின் ரோடு ஷோ நடத்த திட்டமிடப்பட்டுள்ளது. அதற்கேற்ப, அவர் வருகை தரும் மே 31ஆம் தேதி மதுரை விமான நிலையத்திலிருந்து நகரின் முக்கிய வீதிகள் வழியாக 20 கிலோமீட்டர் வரை ரோடு ஷோ நடைபெறும்.
இந்த கூட்டத்தில் திமுக தலைவர் ஸ்டாலினின் தலைமையில் மூவாயிரம் பொதுக்குழு உறுப்பினர்கள் பங்கேற்க உள்ளனர். அவர்களுடன், திமுக மாநில, மாவட்ட நிர்வாகிகள், அமைச்சர்கள், எம்பிக்கள் மற்றும் முக்கிய பிரமுகர்களாக உள்ள பத்து ஆயிரம் பேர் கலந்து கொள்வார்கள் என எதிர்பார்க்கப்படுகிறது. கூட்டம் நடத்தும் பொறுப்பை திமுக தலைமையிலிருந்து பெற்றுள்ள அமைச்சர் மூர்த்தி, பத்து ஆயிரம் பேர் அமரக்கூடிய பந்தலை அமைத்து வருகின்றார்.
மேடையில் நூறு பேர் அமரக்கூடிய வகையில் கூடமைப்பு வேலைகளும் நடைபெற்று வருகிறது. இதுவரை 80 சதவிகித வேலைகள் முடிந்துள்ளன. கூட்டம் தொடங்கும் முன் நூறு அடி உயரத்தில் கொடி ஏற்றும் நிகழ்வும் நடைபெற உள்ளது. நிர்வாகிகள் முதல்நாள் இரவே வர ஆரம்பிக்கிறார்கள் என்பதால், அவர்களுக்கு இடம் தரும் வகையில் மதுரையில் உள்ள அனைத்து நட்சத்திர ஹோட்டல்களும் மூன்று நாட்களுக்கு முன்பே புக் செய்யப்பட்டுள்ளன.
முக்கிய நிர்வாகிகள் தங்கும் இடம், உணவு, பாதுகாப்பு உள்ளிட்ட அனைத்து ஏற்பாடுகளும் முழுமையாக செய்யப்பட்டுள்ளன. கூட்ட முடிந்த பின், பங்கேற்பாளர்களுக்கு சிறப்பான விருந்து வழங்க ஏற்பாடு செய்யப்பட்டுள்ளது. இதில் சைவம், அசைவம், சிறப்பு உணவுகள் — ஈரல், தலைக்கறி, மூளை, மீன், நண்டு, இறால் மற்றும் ஜிகர்தண்டா போன்றவை இடம் பெற உள்ளன.
இந்த பொதுக்குழு கூட்டம் திமுகவின் சட்டமன்றத் தேர்தல் பிரச்சாரத்தின் தொடக்கக்கட்டமாகவும் அமைந்துள்ளது. அதனை நினைவில் நிற்கும் வகையில், ஒவ்வொரு நிகழ்வும் பிரம்மாண்டமாக நடத்தப்படும் என அமைச்சர் மூர்த்தி உறுதிபட செயல்பட்டு வருகிறார்.
