சென்னை: அதிமுக பொதுச் செயலாளரும், எதிர்க்கட்சித் தலைவருமான எடப்பாடி பழனிசாமி, ஆகஸ்ட் 16-ஆம் தேதி அதிமுகவின் அவசர செயற்குழு கூட்டம் நடைபெறும் என அறிவித்துள்ளார். முதலில், ஆகஸ்ட் 9-ஆம் தேதி தலைமை கழக செயலாளர்கள் மற்றும் மாவட்ட கழக செயலாளர்களுக்கான ஆலோசனை கூட்டம் திட்டமிடப்பட்டது, ஆனால் அந்த கூட்டம் திடீரென ஒத்திவைக்கப்பட்டது.
சமீபத்திய மக்களவைத் தேர்தலில் அதிமுக தோல்வியடைந்த பின்னர், அந்தத் தொகுதிகளின் நிர்வாகிகளுடன் தேர்தல் முடிவுகள் குறித்து எடப்பாடி பழனிசாமி பல கட்ட ஆலோசனைகள் நடத்தியுள்ளார். தேர்தல் தோல்விகள் மற்றும் அதன் பின்னணி குறித்து பல்வேறு விவாதங்கள் நடைபெற்றுள்ளன.
அதிமுகவைச் சுற்றியுள்ள நெருக்கடியான சூழலில், திடீரென ம.செ.க. கூட்டம் என அறிவிக்கப்பட்டது, பின்னர் அதிமுக அவசர செயற்குழு கூட்டம் குறித்து அறிவிப்பு வெளியிடப்பட்டது. ஆகஸ்ட் 16-ஆம் தேதி காலை 9.30 மணிக்கு சென்னை ராயப்பேட்டை எம்.ஜி.ஆர் மாளிகையில் நடைபெறும் என அறிவிக்கப்பட்டுள்ளது.
இந்த அவசர செயற்குழு கூட்டத்தில், 2026 சட்டமன்ற தேர்தல் வியூகங்கள், தேர்தலுக்கான ஒருங்கிணைப்பு குழு அமைப்பு உள்ளிட்டவை விவாதிக்கப்படக்கூடும். எடப்பாடி பழனிசாமி, அனைத்து செயற்குழு உறுப்பினர்களும், மாவட்ட கழக செயலாளர்களும், மற்றும் நாடாளுமன்ற உறுப்பினர்களும் கூட்டத்தில் கலந்து கொள்ள வேண்டும் என குறிப்பிட்டுள்ளார்.
