சென்னை: வரவிருக்கும் 2026 சட்டமன்றத் தேர்தல் தொடர்பாக தமிழக பாஜக நிர்வாகிகளுடன் தனித்தனியாக ஆலோசனை நடத்துவதற்காக அமித் ஷா ஜூலை 8-ம் தேதி சென்னை வருகிறார். அடுத்த ஆண்டு தமிழக சட்டமன்றத் தேர்தல் நடைபெற உள்ளது. தேர்தலை எதிர்கொள்ள அனைத்து கட்சிகளும் தங்களைத் தயார்படுத்திக் கொள்கின்றன. இது தொடர்பாக, தமிழ்நாட்டின் மூன்றாவது பெரிய கட்சியாக மாறும் நோக்கில் தமிழக பாஜகவும் களத்தில் தீவிரமாக செயல்பட்டு வருகிறது.
இந்த சூழலில், சமீபத்தில் சென்னை வந்த மத்திய உள்துறை அமைச்சர் அமித் ஷா, அதிமுகவுடனான கூட்டணியை உறுதிப்படுத்தினார். இதைத் தொடர்ந்து, கடந்த 8 ஆம் தேதி மதுரையில் நடைபெற்ற பாஜக நிர்வாகிகள் ஆலோசனைக் கூட்டத்தில் சிறப்பு விருந்தினராக அமித் ஷா பங்கேற்றார். கூட்டத்தில், தமிழகத்தில் பாஜகவை வலுப்படுத்த வேண்டும். கூட்டணிக் கட்சிகளுடன் ஒருங்கிணைந்து செயல்பட வேண்டும். இது குறித்து ஆய்வு செய்ய அடிக்கடி தமிழகம் வருவேன் என்று அமித் ஷா கூறியிருந்தார்.
இதை உறுதிப்படுத்தும் வகையில், நயினார் நாகேந்திரன் நேற்று முன்தினம், ‘சட்டசபைத் தேர்தல் முடியும் வரை மத்திய உள்துறை அமைச்சர் அமித் ஷா அடிக்கடி தமிழகத்திற்கு வருவார்’ என்று கூறியிருந்தார். அதன்படி, ஜூலை 8-ம் தேதி அமித் ஷா சென்னை வருவார் என்று தெரிவிக்கப்பட்டுள்ளது. அப்போது தமிழகத்தில் பாஜகவை வலுப்படுத்தும் பணிகளை அவர் ஆய்வு செய்வார் என்று கூறப்படுகிறது.
பாஜகவின் மூத்த நிர்வாகிகளை தனித்தனியாக சந்தித்து அவர்களின் கருத்துக்களைப் பெறவும் திட்டமிடப்பட்டுள்ளது. அதைத் தொடர்ந்து, அதிமுக பொதுச் செயலாளர் பழனிசாமி, பாமக நிறுவனர் ராமதாஸ், தலைவர் அன்புமணி ஆகியோரைச் சந்தித்து கூட்டணி குறித்துப் பேசுவார் என்று தெரிகிறது. செயற்குழுக் கூட்டத்தின் இறுதியில் கூட்டணி தொடர்பான மேலும் சில அறிவிப்புகள் வெளியிடப்படலாம் என்றும் தெரிவிக்கப்பட்டுள்ளது.
அமித் ஷாவின் சென்னை வருகையின் போது, முன்னாள் முதல்வர் ஓ.பன்னீர்செல்வம், அமமுக பொதுச் செயலாளர் டிடிவி தினகரன், த.மா.கா தலைவர் ஜி.கே.வாசன் மற்றும் பல கட்சித் தலைவர்கள் அமித் ஷாவை சந்திக்க நேரம் கோரியுள்ளதாகவும் கட்சி வட்டாரங்களில் கூறப்படுகிறது.
