சேலம்: சேலத்தில் நேற்று நடந்த திருமண விழாவில் பங்கேற்க வந்த பா.ஜ., மாநில தலைவர் அண்ணாமலை நிருபர்களிடம் கூறியதாவது:- தமிழகத்தில் தற்போது உள்ள முக்கிய பிரச்னை, மாணவர்கள் 3 மொழிகள் படிக்க வேண்டுமா என்பதுதான். தனியார் பள்ளிகளில் படிக்கும் மாணவர்களின் எண்ணிக்கை 56 லட்சத்தை தாண்டியுள்ளது. 52 லட்சம் மாணவர்கள் அரசு பள்ளிகளில் படிக்கின்றனர். சிபிஎஸ்இ பள்ளிகளின் எண்ணிக்கை 200-ல் இருந்து 2,010 ஆக அதிகரித்துள்ளது. மக்கள் தனியார் பள்ளிகளை விரும்புகிறார்கள். திமுக நடத்தும் சிபிஎஸ்இ பள்ளிகளிலும், விசிக தலைவராக இருக்கும் சிபிஎஸ்இ பள்ளிகளிலும் ஹிந்தி கட்டாயப் பாடமாக உள்ளது.
தவெக தலைவர் விஜய் சிபிஎஸ்இ பள்ளி ஒன்றை நடத்தி வருகிறார். ஆனால், அரசுப் பள்ளிகளில் இருமொழிக் கொள்கை வேண்டும் என்கிறார்கள். பிரதமர் அரசு பள்ளிகளில் 3 மொழிகள் வேண்டும். தமிழ் பயிற்று மொழியாகவும், ஆங்கிலம் மற்றும் எந்த விருப்ப மொழியாகவும் இருக்க வேண்டும் என்பதே பாஜகவின் குறிக்கோள். அரசு பள்ளி மாணவர்களுக்கு இலவச உணவு, சீருடை, காலணிகள் வழங்குவதாக உதயநிதி கூறுகிறார். அவனுடைய தாத்தா அப்பா தங்கள் வீட்டுப் பணத்திலா இதைச் செய்கிறார்கள். தமிழக அரசு கல்விக்காக ஆண்டுக்கு 44 ஆயிரம் கோடி ரூபாய் நிதி ஒதுக்குகிறது.
ஆனால், மத்திய அரசு ரூ.2,000 கோடி வழங்காததால் தமிழகத்தில் பள்ளிகளை நடத்த முடியாது என்று கூறுவதை எப்படி ஏற்க முடியும். மும்மொழிக் கொள்கைக்கு ஆதரவாக மார்ச் 1-ம் தேதி முதல் தமிழகத்தில் கையெழுத்து இயக்கம் நடத்தி குடியரசுத் தலைவரிடம் சமர்பிப்போம். தமிழகத்தில் பெண்கள் மற்றும் குழந்தைகளுக்கு எதிரான குற்றங்கள் அதிகரித்துள்ளதாக ஏடிஜிபி அறிக்கை வெளியிட்டுள்ளார். ஆனால் சட்டம் ஒழுங்கு நன்றாக இருப்பதாக முதல்வர் கூறுகிறார். கும்பமேளாவில் பங்கேற்க உள்ளேன். 26-ம் தேதிக்கு பிறகு தமிழகத்தில் இருப்பேன். அப்போது துணை முதல்வர் உதயநிதி கேட்டுக் கொண்டதற்கிணங்க தனியாக சென்னை அண்ணாசாலைக்கு வருவேன்.
இடத்தையும் நேரத்தையும் குறிப்பிடவும். திமுக தகவல் தொழில்நுட்பப் பிரிவும், அரசு இயந்திரமும் எக்ஸ்-சைட்டில் ‘கெட்-அவுட் மோடி’ என்ற டிரெண்டிங் வார்த்தைகளைப் பயன்படுத்தி வருகின்றன. ஸ்டாலின் தமிழகத்தை விட்டு வெளியேற வேண்டும் என்று நாளை எக்ஸ் தளத்தில் ‘கெட்-அவுட் ஸ்டாலின்’ பதிவிடுவோம். யார் அதிகம் ட்ரெண்டிங்கில் இருக்கிறார்கள் என்று பார்ப்போம். அண்ணாமலை தரக்குறைவாக பேசுகிறார் என்கிறார் உதயநிதி. எதிர்க்கட்சி தலைவர் பழனிசாமியை தரக்குறைவாக பேசியவர் உதயநிதி. கும்பமேளாவுக்கு 70 கோடி பேர் வந்துள்ளனர். உத்தரபிரதேச முதல்வர் யோகி ஆதித்யநாத் அங்கு பக்தர்களுக்கு சிறப்பு ஏற்பாடுகளை செய்துள்ளார். ஆனால், சென்னையில் நடந்த விமானப்படையின் ஏரோபாட்டிக்ஸ் நிகழ்ச்சியை காண வந்த 10 லட்சம் பேருக்கு தமிழக அரசால் இடமளிக்க முடியவில்லை என அண்ணாமலை தெரிவித்தார்.
