திருவண்ணாமலை என்ற பெயருக்கு பதிலாக ‘அருணாச்சலம்’ என அரசு பேருந்துகளில் மாற்றம் செய்யப்பட்ட விவகாரம், சமூக வலைதளங்களில் பெரும் சர்ச்சையை ஏற்படுத்தி, கடும் விமர்சனங்களையும் தூண்டியுள்ள சூழலில், தற்போது சம்பந்தப்பட்ட பஸ் நடத்துநர் பணியிடைநீக்கம் செய்யப்பட்டுள்ளார்.
இது தொடர்பாக, கடந்த ஜூலை 15ஆம் தேதி, கள்ளக்குறிச்சி டெப்போவிலிருந்து பெங்களூரு நோக்கி சென்ற அரசு பேருந்தின் எல்.இ.டி திரையில் “திருவண்ணாமலை” என்பதற்குப் பதிலாக “அருணாச்சலம்” என்று காண்பிக்கப்பட்டது. இதைப் புகாராகப் பெற்ற போக்குவரத்து கழகம், சம்பந்தப்பட்ட நடத்துநர் விஜயராகவனை உடனடியாக பணியிலிருந்து இடைநீக்கம் செய்து, நடவடிக்கை எடுத்துள்ளது.
முக்கியமாக, ஆந்திரா மற்றும் தெலுங்கானா மாநிலங்களில் இருந்து திருவண்ணாமலையுக்கு வரும் பக்தர்கள் ‘அருணாச்சலம்’ என வழங்குவதால் அந்த பெயர் சில டூர் பேக்கேஜ்களிலும், பஸ் அடையாளப் பலகைகளிலும் வந்திருந்தது. ஆனால், தமிழ்நாட்டில் இது தமிழர் மரபையும், பக்தி மரபையும் குறைக்கும் செயல் என பலர் கண்டனம் தெரிவித்தனர்.
சமூக ஊடகங்களில் தொடர் விமர்சனங்களும், கட்டுப்பாடின்றி பெயரமைப்புகள் இடம்பெறுவதை தடுக்க வலியுறுத்தும் கருத்துக்களும் பரவிய நிலையில், போக்குவரத்து துறை தற்போது அனைத்து அரசுப் பேருந்துகளிலும் “திருவண்ணாமலை” என்ற ஒரே பெயர் பயன்படுத்தப்பட வேண்டும் என கண்டிப்பான உத்தரவை வழங்கியுள்ளது.
