மதுரை: இலங்கை கடற்படையினரால் தமிழக மீனவர்கள் கைது செய்யப்படுவதை தடுக்கக் கோரிய வழக்கில் மத்திய, மாநில அரசுகள் பதிலளிக்க உயர்நீதிமன்ற மதுரைக் கிளை உத்தரவிட்டுள்ளது.
உயர் நீதிமன்ற மதுரை அமர்வில் மதுரையைச் சேர்ந்த கே.கே.ரமேஷ் என்பவர் தாக்கல் செய்த மனுவில், “இலங்கை கடற்படையினரால் தமிழக மீனவர்கள் தாக்கப்படும் சம்பவங்கள் அன்றாட நிகழ்வாகிவிட்டது.
தமிழக மீனவர்களின் பாதுகாப்பையும், வாழ்வாதாரத்தையும் உறுதி செய்யும் வகையில், இந்தியா-இலங்கை இடையேயான சர்வதேச எல்லைக் கோட்டிலிருந்து இந்திய மீனவர்களுக்கு பாதுகாப்பு அளிக்க இந்திய கடற்படைக் கப்பலை தற்காலிகமாக உத்தரவிட வேண்டும்.
மேலும், இலங்கை கடற்படையால் இந்திய மீனவர்கள் கொல்லப்படுவதையும், வலைகளை கைப்பற்றுவதையும், படகுகளை பறிமுதல் செய்வதையும், கைது செய்வதையும் தடுக்க, இலங்கை அரசுடன் பேச்சுவார்த்தை நடத்த மத்திய அரசுக்கு உத்தரவிட வேண்டும்” என்று கூறப்பட்டுள்ளது.
இந்த மனுவை நீதிபதிகள் சுப்ரமணியன், விக்டோரியா கவுரி ஆகியோர் அடங்கிய அமர்வு இன்று (அக்டோபர் 19) விசாரித்து, இந்த வழக்கில் மத்திய, மாநில அரசுகள் பதிலளிக்க உத்தரவிட்டு விசாரணையை ஒத்திவைத்தது.
முன்னதாக விசாரணையின் போது, இந்த வழக்கில் தேவையில்லாமல் பிரதமரின் முதன்மைச் செயலாளரைச் சேர்த்துள்ளதாகவும், அவரை வழக்கில் இருந்து நீக்க வேண்டும் என்றும் மத்திய அரசு வழக்கறிஞர் மனுவில் தெரிவித்துள்ளார்.
அப்போது நீதிபதிகள், “பிரதமர் பேச்சுவார்த்தை நடத்தினால் மீனவர் பிரச்னைக்கு தீர்வு கிடைக்கும் என மனுதாரர் நினைக்கிறார். அதில் தவறில்லை. பிரதமரின் முதன்மை செயலாளரையும் வழக்கில் சேர்த்ததில் என்ன தவறு? தேவைப்பட்டால் அதற்கான காரணத்துடன் மனு தாக்கல் செய்யுங்கள்.
இந்த வழக்கில் இருந்து பிரதமரின் முதன்மை செயலாளரை நீக்க வேண்டும்” என்று மத்திய அரசு வழக்கறிஞருக்கு உத்தரவிட்டனர்.
