திருப்பூர் மாவட்டம் அவிநாசியில் ஏற்பட்ட ரிதன்யா தற்கொலை வழக்கில், காங்கிரஸ் கட்சி ஒருபோதும் தலையிடாது என தமிழ்நாடு காங்கிரஸ் கமிட்டித் தலைவர் செல்வப்பெருந்தகை உறுதியாக தெரிவித்துள்ளார். ரிதன்யாவின் கணவர் கவின்குமாரின் தாத்தா திருப்பூர் மாவட்ட காங்கிரஸ் தலைவர் என்ற விவரம் பரபரப்பை ஏற்படுத்திய நிலையில், அரசியல் அழுத்தம் இருந்தது என ரிதன்யாவின் தாயார் வலியுறுத்தினார்.
இதைத் தொடர்ந்து சென்னை விமான நிலையத்தில் செய்தியாளர்களிடம் பேசிய செல்வப்பெருந்தகை, ஒருவரின் குடும்ப உறுப்பினர் தவறு செய்ததற்காக கட்சியை ஒட்டிப் பார்க்க முடியாது என்றார். எந்தக் காங்கிரஸ் உறுப்பினர் தலையிட்டாலும் கடுமையான நடவடிக்கை எடுப்போம் எனவும் கூறினார். பாதிக்கப்பட்டோரின் பக்கம் தான் காங்கிரஸ் எப்போதும் நிற்கும் என்றும் தெரிவித்துள்ளார்.
இந்நிலையில், கடந்த ஜூன் 28-ஆம் தேதி, கோயிலுக்குச் செல்வதாகக் கூறிவிட்டு காரில் விஷம் குடித்து தற்கொலை செய்துகொண்ட ரிதன்யா சம்பவம் தமிழகத்தை அதிர்ச்சியில் ஆழ்த்தியுள்ளது. தற்கொலைக்கு முன் தனது தந்தைக்கு அனுப்பிய ஆடியோவில், கணவரும் அவரது பெற்றோர்களும் தன் மீது மன மற்றும் உடல் ரீதியான சித்ரவதை செய்ததாக அவர் புலம்பினார்.
திருமணத்தின் போது ஏற்கனவே அளிக்கப்பட்ட 300 பவுன் நகைக்கும், 70 லட்சம் ரூபாய் மதிப்பிலான கார், மற்றும் 2.25 கோடி செலவில் திருமணம் நடந்ததையும், மீதமுள்ள 200 பவுன் நகைக்கு கணவர் தொடர்ந்து அழுத்தம் கொடுத்ததாகவும் புகார் கூறப்பட்டுள்ளது.
தற்போது கணவர் கவின்குமார், மாமனார் ஈஸ்வரமூர்த்தி, மற்றும் தலைமறைவாக இருந்த மாமியார் சித்ராதேவி கைது செய்யப்பட்டுள்ளனர். ரிதன்யாவின் தற்கொலை தொடர்பான ஆடியோ மெசேஜ் வலுவான ஆதாரமாக இருந்ததால், குற்றவாளிகள் மீது கடும் தண்டனை ஏற்படும் என எதிர்பார்க்கப்படுகிறது.
