கோவை/நாமக்கல்: எண்ணெய் நிறுவன அதிகாரிகளுடன் நடத்திய பேச்சுவார்த்தை தோல்வியில் முடிந்ததால், வேலை நிறுத்தம் தொடரும் என, காஸ் டேங்கர் லாரி உரிமையாளர்கள் அறிவித்துள்ளனர். வேலை நிறுத்தம் காரணமாக சுமார் 5,000 டேங்கர் லாரிகள் நிறுத்தப்பட்டுள்ளன. இதனால் தமிழகம் உள்ளிட்ட 5 மாநிலங்களில் சமையல் காஸ் சிலிண்டர் தட்டுப்பாடு ஏற்பட்டுள்ளது.
தமிழ்நாடு, கேரளா, கர்நாடகா, ஆந்திரா, தெலுங்கானா, புதுச்சேரி ஆகிய மாநிலங்களை உள்ளடக்கிய தென்னக எரிவாயு டேங்கர் லாரி உரிமையாளர்கள் சங்கம், நாமக்கல்லை தலைமையிடமாகக் கொண்டு செயல்பட்டு வருகிறது. இந்த சங்கத்தில் உள்ள டேங்கர் லாரிகள், மத்திய அரசின் எண்ணெய் நிறுவனங்களான ஐஓசி, பிபிசி மற்றும் எச்பிசிக்கு சொந்தமான சுத்திகரிப்பு ஆலைகளில் இருந்து எரிவாயுவை பாட்டில் மையங்களுக்கு கொண்டு செல்ல பயன்படுத்தப்படுகிறது. மொத்தம் 5,000 லாரிகள் ஒப்பந்த அடிப்படையில் இயக்கப்படுகின்றன.
இந்நிலையில், இந்த ஆண்டு அறிவிக்கப்பட்ட வாடகை ஒப்பந்தத்தில் புதிய கட்டுப்பாடுகள் விதிக்கப்பட்டதற்கு டேங்கர் லாரி உரிமையாளர்கள் சங்கத்தினர் மத்தியில் எதிர்ப்பு எழுந்துள்ளது. புதிய கட்டுப்பாடுகளை தளர்த்துவது தொடர்பாக டேங்கர் லாரி உரிமையாளர்கள் மற்றும் எண்ணெய் நிறுவன அதிகாரிகளுக்கு இடையே நேற்று முன்தினம் நடந்த பேச்சுவார்த்தை தோல்வியில் முடிந்தது. இதையடுத்து டேங்கர் லாரி உரிமையாளர்கள் காலவரையற்ற வேலைநிறுத்தம் அறிவித்தனர். நேற்று காலை வேலை நிறுத்தம் தொடங்கியது.
இந்நிலையில் நேற்று மாலை கோவை அவிநாசி ரோடு லட்சுமி மில் அருகே உள்ள தனியார் ஓட்டல் வளாகத்தில் டேங்கர் லாரி உரிமையாளர்கள் சங்கத்தினருக்கும், எண்ணெய் நிறுவன அதிகாரிகளுக்கும் இடையே பேச்சுவார்த்தை நடந்தது. மாலை 4 மணிக்கு தொடங்கிய பேச்சுவார்த்தை எந்த முடிவும் எட்டப்படாமல் இரவு 7.45 மணிக்கு முடிவுக்கு வந்தது. இதுகுறித்து டேங்கர் லாரி உரிமையாளர் சங்க தலைவர் சுந்தரராஜன் நிருபர்களிடம் கூறியதாவது:-
3 நிறுவன அதிகாரிகளுடன் பேச்சுவார்த்தை நடத்தியும் பிரச்னைக்கு தீர்வு காணப்படவில்லை. பேச்சுவார்த்தையின் போது உயர் அதிகாரிகளுடன் எங்களது கோரிக்கைகள் குறித்து ஆலோசிப்போம் என எண்ணெய் நிறுவன அதிகாரிகள் கூறுகின்றனர். ஆனால், எண்ணெய் நிறுவனங்கள் எங்களது கோரிக்கையை ஏற்க மறுத்து வருகின்றன. எடை மற்றும் தூரத்தைப் பொறுத்து வாடகைக் கட்டணம் நிர்ணயிக்கப்படுகிறது. அபராதத் தொகை ஆரோக்கியமானதல்ல. இதனால் தொழில் நடத்த முடியாத நிலை உள்ளது. எனவே, எரிவாயு டேங்கர் லாரிகளின் காலவரையற்ற வேலைநிறுத்தம் தொடர்கிறது. 1,500 உறுப்பினர்களுடன் கலந்தாலோசித்த பிறகே இது தொடர்பாக மற்றொரு முடிவை எடுப்போம்.
அழிவை நோக்கி செல்லும் தொழிலையும், சங்க உறுப்பினர்களையும் காப்பாற்றும் நோக்கில் வேலை நிறுத்தத்தில் ஈடுபட்டுள்ளோம். இதில் வெற்றி பெறுவோம். எங்களது வேலைநிறுத்தம் காரணமாக, சென்னை, மங்களூரு, கொச்சி, பாலக்காடு மற்றும் பிற இடங்களில் உள்ள அனைத்து எண்ணெய் சுத்திகரிப்பு நிலையங்கள் மற்றும் பாட்டில் மையங்களுக்கு எரிவாயு டேங்கர் லாரிகள் செல்வது நிறுத்தப்பட்டுள்ளது. அந்த வகையில் சுமார் 5,000 எரிவாயு டேங்கர் லாரிகள் நிறுத்தப்பட்டுள்ளன. தென் மண்டலத்தில் மட்டும் 4,000 லாரிகள் நிறுத்தப்பட்டுள்ளன. எங்களது போராட்டத்தால் அரசுக்கு தற்போது வருவாய் இழப்பு ஏற்படவில்லை. அதே நேரத்தில் தமிழகம் உள்ளிட்ட 5 மாநிலங்களில் சமையல் எரிவாயு சிலிண்டர் தட்டுப்பாடு ஏற்படும் அபாயம் ஏற்பட்டுள்ளது.
இதனால் பொதுமக்களுக்கு இடையூறு ஏற்படும். நாங்கள் வாகனத்தை இயக்காவிட்டாலும் அதற்கான வரியை செலுத்தியுள்ளோம். எனவே, எங்களின் நோக்கம் நஷ்டம் ஏற்படாமல், மக்கள் பாதிக்கப்படாமல் இருக்க வேண்டும் என்பதே. எண்ணெய் நிறுவன அதிகாரிகளின் நோக்கமும் இதுதான். எனவே, எண்ணெய் நிறுவனங்கள் இதற்கு வழி கண்டுபிடிக்கும். தற்போது 3 நாட்களுக்கு எரிவாயு இருப்பு உள்ளது. அதன் பிறகுதான் பிரச்னை ஏற்பட வாய்ப்புள்ளது. எனவே, மக்களின் நலன் கருதி எண்ணெய் நிறுவனங்கள் விதிகளை மாற்ற வேண்டும். அடுத்த கட்ட பேச்சுவார்த்தை தேதி இன்னும் அறிவிக்கப்படவில்லை. இப்பிரச்னையில் மத்திய பெட்ரோலியத்துறை அமைச்சர் தலையிட்டு, ஒப்பந்தத்தில் உள்ள கட்டுப்பாடுகளை நீக்கி, அனைத்து லாரி உரிமையாளர்களுக்கும் வேலை உறுதி செய்ய வேண்டும். அதுவரை டேங்கர் லாரி வேலை நிறுத்தம் தொடரும். எங்கள் கோரிக்கைகள் நிறைவேறும் வரை டேங்கர் லாரிகள் ஓடாது. இவ்வாறு அவர் கூறினார்.
