புதுடெல்லி: முன்னாள் மத்திய அமைச்சர் ப.சிதம்பரத்தின் மகனும், காங்கிரஸ் எம்.பி.யுமான கார்த்தி சிதம்பரம், இந்தியாவில் உள்ள சீனர்களுக்கு பணி விசா வழங்குவதற்காக ரூ.50 லட்சம் முறைகேடாக பெற்றதாக எழுந்த புகாரின் பேரில் சிபிஐ வழக்கு பதிவு செய்து விசாரணை நடத்தி வருகிறது. இந்த நிலையில், பணமோசடி தடுப்புச் சட்டத்தின் கீழ் அமலாக்க இயக்குனரகம் வழக்குப் பதிவு செய்துள்ளது.
இந்த வழக்கில் அமலாக்க இயக்குனரகம் கைது செய்வதை தவிர்க்கும் வகையில் கார்த்தி சிதம்பரத்திற்கு இடைக்கால பாதுகாப்பு வழங்கப்பட்டுள்ளது. மேலும், ஏர்செல்-மேக்சிஸ் ஒப்பந்த மோசடி தொடர்பாக சிபிஐ மற்றும் அமலாக்க இயக்குனரகம் பதிவு செய்த வழக்குகள் மீதான விசாரணை நடைபெற்று வருகிறது. இதில், அமலாக்க இயக்குனரகம் தொடர்ந்த பணமோசடி வழக்குகளில் குற்றப்பத்திரிகை தாக்கல் செய்வது குறித்து விசாரணை நடத்த டெல்லி சிறப்பு நீதிமன்றம் முடிவு செய்தது.
இந்த வழக்கின் இறுதி விசாரணை முடியும் வரை அமலாக்க இயக்குனரகம் தொடர்ந்த வழக்குகளில் குற்றப்பத்திரிகை தாக்கல் செய்ய தடை கோரி கார்த்தி சிதம்பரம் டெல்லி உயர்நீதிமன்றத்தில் மனு தாக்கல் செய்திருந்தார். இந்த மனுவை விசாரித்த டெல்லி உயர் நீதிமன்ற நீதிபதி ரவீந்திர துதேஜா பிறப்பித்த உத்தரவில், “அமலாக்க இயக்குனரகம் பதிவு செய்த பணமோசடி வழக்கில் குற்றப்பத்திரிகை தாக்கல் செய்வதை ஒத்திவைக்கலாமா அல்லது திட்டமிட்ட குற்ற வழக்கில் குற்றச்சாட்டுகள் முடிவடையும் வரை இடைக்காலத் தடை விதிக்கலாமா?” என்று கேட்டுள்ளார்.
அமலாக்க இயக்குனரகம் பதிலளிக்குமாறு கேட்டுக்கொண்ட அவர், அதற்கு நோட்டீஸ் அனுப்பினார். மேலும், கார்த்தி சிதம்பரம் மீதான பணமோசடி வழக்குகளில் குற்றப்பத்திரிகை தாக்கல் செய்வது தொடர்பான விசாரணையை சிறப்பு நீதிமன்றம் ஒத்திவைக்க வேண்டும் என்றும் உத்தரவிட்டார்.
