வெம்பக்கோட்டை விஜய கரிசல்குளம் பகுதியில் 3-ம் கட்ட அகழாய்வில், கைரேகை பதிவுடன் கூடிய அல்லிமொட்டு வடிவிலான ஆட்டக்காய் முதன்முதலாக கண்டெடுக்கப்பட்டுள்ளது.
2022-ல் தொடங்கிய முதல் கட்ட அகழாய்வில் 3,254 தொல்பொருட்கள் மற்றும் 2023-ல் இரண்டாம் கட்ட அகழாய்வில் 4,660 தொல்பொருட்கள் கண்டெடுக்கப்பட்டன. இதில் திமிலுடைய காளை, செப்பு நாணயங்கள், சங்கு வளையல்கள் உள்ளிட்ட பழங்கால பொருட்கள் அடங்கும்.
மூன்றாம் கட்ட அகழாய்வில் தற்போது வரை 2,850-க்கும் மேற்பட்ட தொல்பொருட்கள் கண்டெடுக்கப்பட்டுள்ளன. இதன் ஒரு பகுதியாக, சுடுமண்ணால் ஆன நீள்வட்டம், கூம்பு வடிவம் மற்றும் அல்லிமொட்டு வடிவ ஆட்டக்காய்கள் கண்டெடுக்கப்பட்டன.
இந்த ஆட்டக்காய்களில் ஒன்றில் கைரேகை பதிவாக இருப்பது கண்டறியப்பட்டுள்ளது. இதன் மூலம் ஆட்டக்காய் தயாரித்த நபரின் பாலினம், வயது போன்ற தகவல்களை ஆராய முடியும் என அகழாய்வு இயக்குநர் பொன் பாஸ்கர் தெரிவித்துள்ளார்.
இந்த கண்டெடுப்புகள் அக்கால மக்களின் பொழுதுபோக்கில் ஆட்டக்காய்கள் முக்கிய பங்காற்றியதையும், அப்பகுதியில் தொழில்சாலைகள் செயல்பட்டிருப்பதற்கான சாத்தியத்தை வெளிப்படுத்துகின்றன.
கைப்பதிவு தொடர்பான மேலதிக தகவல்களை கண்டறியும் முயற்சியில், கைரேகைகளை ஆய்வு செய்வது உள்ளிட்ட பல்வேறு செயல்பாடுகள் மேற்கொள்ளப்படுகின்றன.
இது பழங்கால இந்தியாவின் தொழில்நுட்பத் திறமைகளுக்கும் சமூக வரலாறிற்கும் ஒரு முக்கியத் தகவல் புதையலாகும்.
