சென்னை: எதிர்க்கட்சி தலைவர் எடப்பாடி பழனிசாமி வெளியிட்டுள்ள அறிக்கை:- இந்த ஆண்டு வழக்கம் போல் முல்லைப் பெரியாறு அணையில் பழுதுபார்க்கும் பணிக்காக தமிழக நீர்வளத்துறை அதிகாரிகள் இரண்டு லாரிகளில் கட்டுமானப் பொருட்களை ஏற்றிச் சென்றபோது, கேரள வனத்துறையினர் சோதனையில் கட்டுமானப் பொருட்களை ஏற்றிச் சென்ற 2 லாரிகள் நிறுத்தப்பட்டன.
கேரள நீர்வளத்துறை (பொதுப்பணித்துறை) அனுமதி பெற்ற பிறகே கட்டுமான பொருட்கள் கொண்டு செல்லப்படுவதாக தமிழக அதிகாரிகள் தெரிவித்துள்ளனர். ஆனால், இது தொடர்பாக எந்த தகவலும் வராததால், கேரள வனத்துறையினர் நேற்று வரை கட்டுமான பொருட்களை ஏற்றிச் செல்லும் லாரிகளை முல்லைப் பெரியாறு பகுதிக்குள் அனுமதிக்க மாட்டோம் எனக்கூறி அனுமதிக்கவில்லை.
இந்த செய்தி அறிந்து முல்லைப் பெரியாறு அணையை நம்பியுள்ள 5 மாவட்ட மக்களும் இன்று கடும் கொந்தளிப்பில் உள்ளனர். தமிழக-கேரள எல்லையான தேனி மாவட்டம் லோயர்கேம்ப் பகுதியில் 5 மாவட்ட விவசாயிகள் சங்க தலைவர்கள் மற்றும் நிர்வாகிகள், விவசாயிகள், பொதுமக்கள் மறியலில் ஈடுபட முயன்றதை தமிழக காவல் துறையினர் தடுத்து நிறுத்தியதாக தகவல்கள் தெரிவிக்கின்றன.
முல்லைப் பெரியாறு அணையில் ஆண்டுதோறும் நடைபெறும் பராமரிப்புப் பணிகளுக்கான கட்டுமானப் பொருட்களை ஏற்றிச் செல்ல உரிய அனுமதி பெறாத அரசைக் கண்டிக்கிறேன். முல்லைப் பெரியாறு அணையில் ஆண்டுதோறும் மேற்கொள்ளப்படும் பராமரிப்புப் பணிகளை அரசு உடனடியாக மேற்கொள்ள வேண்டும் என வலியுறுத்துகிறேன். இவ்வாறு அவர் கூறினார்.
