திண்டிவனம்: தைலாபுரம் எஸ்டேட்டில் பாமக நிறுவனர் ராமதாஸ் நேற்று நிருபர்களிடம் கூறியதாவது:-
நடப்பு ஆண்டில் தமிழக அரசு ரூ. 44 ஆயிரம் கோடி கல்விக்காகவும், சுகாதாரத் துறைக்கு ரூ. 20,198 கோடி. இது திமுக ஒதுக்குவதாகக் கூறிய தொகையில் மூன்றில் ஒரு பங்கிற்கும் குறைவு.
அ.தி.மு.க. ஆட்சியில் மொத்த உற்பத்தி மதிப்பில் 1.65 சதவீதம் கல்விக்காக ஒதுக்கப்பட்டது. ஆனால், தி.மு.க. ஆட்சியில் 1.39 சதவீத நிதியே ஒதுக்கப்படுகிறது. அதேபோல் அ.தி.மு.க. ஆட்சியில் சுகாதாரத்துறைக்கு 0.76 சதவீதம் ஒதுக்கப்பட்ட நிலையில், தற்போது 0.64 சதவீதம் மட்டுமே ஒதுக்கப்பட்டுள்ளது.
தமிழகத்தில் கல்வி மற்றும் சுகாதாரத் துறைகள் போதிய நிதி ஒதுக்கீடு இல்லாததால் அடிப்படை கட்டமைப்பு வசதிகள் கூட இல்லாமல் சீரழிந்து வருகிறது. கடந்த மூன்றரை ஆண்டுகளில் 2,027 பள்ளி ஆசிரியர்கள் மட்டுமே நியமிக்கப்பட்டுள்ளனர்.
அரசு மருத்துவமனைகளில் போதிய உயிர்காக்கும் மருந்து கூட இல்லை. சென்னையில் வெள்ள தடுப்பு பணிகளை மேற்கொள்ள அரசு தவறிவிட்டது. மழையால் சேதமடைந்த நெற்பயிர்களுக்கு ஏக்கருக்கு ரூ.40 ஆயிரம் இழப்பீடு வழங்க வேண்டும்.
விழுப்புரம் மற்றும் கள்ளக்குறிச்சி மாவட்டத்தில் புதிதாக 3 மதுக்கடைகள் திறக்க முடிவு செய்திருப்பது கண்டனத்துக்குரியது. புதிய மதுக்கடைகள் திறந்தால் நானே பூட்டி வைப்பேன்.
முல்லைப் பெரியாறு அணையில் துணைக் கண்காணிப்புக் குழுவின் ஆய்வை தமிழக அரசு அதிகாரிகள் புறக்கணித்தது பாராட்டுக்குரியது. இவ்வாறு ராமதாஸ் கூறினார்.
