சென்னை: தமிழகத்தில் வடகிழக்கு பருவமழை பரவலாக பெய்து வருகிறது. இதனிடையே வங்கக்கடலில் உருவான குறைந்த காற்றழுத்த தாழ்வு பகுதி நேற்று முன்தினம் காற்றழுத்த தாழ்வு மண்டலமாக வலுப்பெற்றது. அதைத் தொடர்ந்து, அது தீவிர காற்றழுத்த தாழ்வு மண்டலமாக வலுப்பெற்று, தென் இலங்கை மற்றும் அதை ஒட்டிய தென்மேற்கு வங்கக் கடலில் நிலவியது. இந்நிலையில் இன்று ஆழ்ந்த காற்றழுத்த தாழ்வு பகுதியின் இயக்கத்தின் வேகம் அதிகரித்தது.
இந்நிலையில், வங்கக்கடலில் உருவாகியுள்ள ஆழ்ந்த காற்றழுத்த தாழ்வு மண்டலம் புயலாக (பெங்கல் புயல்) மாறும் என இந்திய வானிலை ஆய்வு மையம் கணித்துள்ளது. இதன் காரணமாக இன்று கடலூர், மயிலாடுதுறை மாவட்டங்கள் மற்றும் காரைக்கால் பகுதிகளில் ஓரிரு இடங்களில் மிக கனமழை பெய்ய வாய்ப்புள்ளதாகவும், சில இடங்களில் கனமழை முதல் மிக கனமழை வரை பெய்ய வாய்ப்புள்ளதாகவும் தெரிவிக்கப்பட்டுள்ளது. இந்த மாவட்டங்களில் மிக கனமழைக்கு ‘ரெட் அலர்ட்’ எச்சரிக்கை விடுக்கப்பட்டுள்ளது.
மேலும் பல்வேறு மாவட்டங்களில் கனமழை பெய்யும் என்றும் தெரிவிக்கப்பட்டுள்ளது. இந்நிலையில், கனமழை காரணமாக பல்வேறு மாவட்டங்களில் பள்ளி, கல்லூரிகளுக்கு விடுமுறை அறிவிக்கப்பட்டுள்ளது. இதையடுத்து தமிழகம் முழுவதும் இன்று நடைபெற இருந்த பல்வேறு செமஸ்டர் தேர்வுகள் ஒத்திவைக்கப்பட்டுள்ளன. அதன்படி; இன்று நடைபெற இருந்த சென்னை பல்கலைக்கழக தேர்வுகள் ஒத்திவைக்கப்பட்டுள்ளன. மாற்று தேதி பின்னர் அறிவிக்கப்படும் என சென்னை பல்கலைக்கழகம் அறிவித்துள்ளது.
திருச்சி பாரதிதாசன் பல்கலைக்கழகத்தின் கீழ் உள்ள கல்லூரிகளில் இன்று நடைபெற இருந்த அனைத்து இளங்கலை மற்றும் முதுகலை எழுத்துத் தேர்வுகள் ஒத்திவைக்கப்பட்டுள்ளதாக தேர்வுக் கட்டுப்பாட்டாளர் ஜெயபிரகாஷ் அறிவித்துள்ளார்.
கனமழை காரணமாக தமிழகம் முழுவதும் இன்று நடைபெறவிருந்த அனைத்து பாலிடெக்னிக் செமஸ்டர் தேர்வுகள் மற்றும் டிப்ளமோ தேர்வுகள் ஒத்திவைக்கப்பட்டுள்ளதாக தொழில்நுட்ப கல்வி இயக்ககம் அறிவித்துள்ளது. காரைக்குடி அழகப்பா பல்கலைக்கழக இணைப்புக் கல்லூரிகளில் (சிவகங்கை மற்றும் ராமநாதபுரம் மாவட்டம்) இன்று நடைபெற இருந்த செமஸ்டர் தேர்வுகள் ஒத்திவைக்கப்பட்டுள்ளதாக அழகப்பா பல்கலைக்கழக நிர்வாகம் தெரிவித்துள்ளது.
கடலூர் சிதம்பரம் அண்ணாமலைப் பல்கலைக்கழகத்தில் இன்று நடைபெற இருந்த தேர்வுகள் ஒத்திவைக்கப்பட்டுள்ளன. மயிலாடுதுறையில் இன்று நடைபெற இருந்த கூட்டுறவு சங்க விற்பனையாளர் நேர்காணல் தேர்வு ஒத்திவைக்கப்பட்டுள்ளது. இந்த நேர்காணல் தேர்வு டிசம்பர் 4-ம் தேதிக்கு ஒத்திவைக்கப்பட்டுள்ளதாக மயிலாடுதுறை மாவட்ட ஆட்சியர் அறிவித்துள்ளார்.
