சென்னை: நிபந்தனைகளை நிறைவேற்றாமல் ஜாமீன் பெற்று சிறையில் அடைப்பது மனித உரிமை மீறல் என்று கூறிய சென்னை உயர் நீதிமன்ற நீதிபதிகள், இதுகுறித்து உரிய நடவடிக்கை எடுக்குமாறு மாநில சட்டப்பணிகள் ஆணைக்குழுவுக்கும், சிறை நிர்வாகத்துக்கும் அறிவுறுத்தியுள்ளனர். ஜாமீன் கிடைத்தும் நிபந்தனைகளை நிறைவேற்ற முடியாமல் தமிழகம் முழுவதும் சிறைகளில் அடைக்கப்பட்ட கைதிகள் விவகாரம் தொடர்பாக சென்னை உயர்நீதிமன்றம் இந்த வழக்கை தன்னிச்சையாக எடுத்து விசாரித்தது.
இந்த வழக்கு, நீதிபதிகள் எஸ்.எம்., சுப்பிரமணியம் மற்றும் எம். ஜோதிராமன் அடங்கிய அமர்வு முன், மீண்டும் விசாரணைக்கு வந்தது. அப்போது, ஜாமீன் கிடைத்த பின்னரும் சிறையில் உள்ள கைதிகள் குறித்து சிறை வாரியாக அறிக்கைகள் பெறப்பட்டு, அவர்களை வெளியே கொண்டு வர நாள்தோறும் நடவடிக்கை எடுக்கப்பட்டு வருவதாக மாநில சட்டப் பணிகள் ஆணைக்குழு தெரிவித்துள்ளது. அதை பதிவு செய்து கொண்ட நீதிபதிகள், சிறையில் உள்ள கைதிகளின் விவரங்களை மாநில சட்டப்பணிகள் ஆணைக்குழு அல்லது சம்பந்தப்பட்ட வழக்கறிஞர்களுடன் பகிர்ந்து கொள்ளுமாறு சிறை அதிகாரிகளுக்கு அறிவுறுத்தினர்.
மேலும், ஒருவருக்கு ஜாமீன் வழங்கப்பட்டால், அவர் உடனடியாக சிறையில் இருந்து வெளியே வருவதை உறுதி செய்ய வேண்டும் என்றும், ஜாமீன் கிடைத்த பிறகும் சிறையில் அடைத்தால் அது மனித உரிமை மீறல் என்றும் அவர்கள் கருத்து தெரிவித்துள்ளனர். பின்னர், ஜாமீன் பெற்ற கைதிகளை குடும்பச் சூழ்நிலை காரணமாக சிறையில் அடைக்காமல் இருக்க மாநில சட்டப் பணிகள் ஆணைக்குழுவும், சிறை நிர்வாகமும் உரிய நடவடிக்கை எடுக்க வேண்டும் எனக் கூறி வழக்கை முடித்து வைத்தனர்.
