சென்னை: சென்னை மாநகராட்சி பகுதிகளில் உள்ள கடைகள், வணிக நிறுவனங்கள், உணவு நிறுவனங்கள் மற்றும் தொழிற்சாலைகளில் தமிழில் பெயர்ப்பலகை வைப்பது தொடர்பாக தொழிலாளர் துறை மற்றும் சென்னை மாநகராட்சி இணைந்து ஏற்பாடு செய்த வணிகர் சங்க பிரதிநிதிகளுடனான ஆலோசனைக் கூட்டம் நேற்று ரிப்பன் கட்டிட வளாகத்தில் நடைபெற்றது. தொழிலாளர் ஆணையர் சி.ஏ. ராமன் தலைமையில் நடைபெற்ற கூட்டத்தில் பேசிய அவர் கூறியதாவது:-
தமிழில் பெயர்ப்பலகை வைப்பதை உறுதி செய்வதற்காக மாவட்ட ஆட்சியர் தலைமையில் அனைத்து மாவட்டங்களிலும் மாவட்ட அளவிலான குழுக்கள் அமைக்கப்பட்டுள்ளன. இந்தக் குழுவில் தொழிலாளர் உதவி ஆணையர்கள் (அமலாக்கத்துறை) உறுப்பினர்களாகவும், தொழில் பாதுகாப்பு மற்றும் சுகாதார இயக்குநரகத்தின் இணை இயக்குநர், தமிழ் வளர்ச்சித் துறையின் உதவி இயக்குநர், மாநகராட்சி ஆணையர், நகராட்சி ஆணையர், பேரூராட்சி உதவி இயக்குநர், பஞ்சாயத்து உதவி இயக்குநர், மாவட்ட அளவிலான வர்த்தக சங்கங்களின் பிரதிநிதிகள், மாவட்ட அளவிலான உணவு நிறுவன உரிமையாளர் சங்கங்களின் பிரதிநிதிகள் மற்றும் மாவட்ட அளவிலான முதலாளிகள் சங்கங்களின் பிரதிநிதிகள் உறுப்பினர்களாகவும் உள்ளனர்.
இந்தக் குழுவின் மூலம், தமிழில் பெயர்ப்பலகைகளை காட்சிப்படுத்துவதை உறுதி செய்வதற்கான உத்திகளை உருவாக்குதல், தொடர்புடைய துறைகள் மற்றும் பங்குதாரர்களிடமிருந்து ஒத்துழைப்பைப் பெறுதல், தமிழில் பெயர்ப்பலகைகளை காட்சிப்படுத்துவது தொடர்பான சட்டம் குறித்த விழிப்புணர்வை ஏற்படுத்துவதற்கான வழிமுறைகளை உருவாக்குதல் போன்ற நடவடிக்கைகள் மேற்கொள்ளப்படுகின்றன. மேலும், மாநகராட்சி ஆணையர் மற்றும் உள்ளாட்சி அமைப்புகளின் அதிகாரிகள் தொடர்புடைய வர்த்தக சங்கங்களின் பிரதிநிதிகள், உணவு நிறுவன உரிமையாளர் சங்கங்களின் பிரதிநிதிகள் மற்றும் முதலாளிகள் சங்கங்களின் பிரதிநிதிகளுடன் கூட்டங்களை நடத்தி தமிழில் பெயர்ப்பலகைகளை காட்சிப்படுத்துவதன் அவசியம் குறித்து விழிப்புணர்வை ஏற்படுத்த வேண்டும்.
தமிழில் பெயர்ப்பலகைகளை காட்சிப்படுத்தாத உள்ளாட்சி அமைப்புகளில் உள்ள கடைகள் மற்றும் நிறுவனங்களுக்கு ரூ.2000 அபராதம் விதிக்கப்படும். தமிழ்நாடு கடைகள் மற்றும் நிறுவனங்கள் விதிகளின் கீழ் அபராதம் விதிக்கப்படும். கேட்டரிங் நிறுவனங்கள் தமிழில் பெயர்ப்பலகைகளை வைக்கவில்லை என்றால், தமிழ்நாடு கேட்டரிங் நிறுவனங்கள் சட்டத்தின் கீழ் ரூ.500 வரை அபராதம் விதிக்க பரிந்துரைக்கப்பட்டுள்ளது. இவ்வாறு அவர் கூறினார். கூட்டத்தில் மாநகராட்சி துணை ஆணையர் எம். பிரதிவிராஜ், தொழில்துறை பாதுகாப்பு மற்றும் சுகாதார இணை இயக்குநர் கார்த்திகேயன், நகராட்சி வருவாய் அலுவலர் கே.பி. பானுசந்தர் மற்றும் பலர் கலந்து கொண்டனர்.
