சென்னை: சர்வதேச சிவில் ஏவியேஷன் அமைப்பின் 80-வது ஆண்டு விழா சென்னையில் நேற்று கோலாகலமாக கொண்டாடப்பட்டது. சர்வதேச சிவில் விமானப் போக்குவரத்து அமைப்பு (ICAO) 1944-ம் ஆண்டு பொதுச் சபையால் உலகெங்கிலும் உள்ள விமானப் போக்குவரத்தை ஒழுங்குபடுத்தவும் வழிகாட்டவும் நிறுவப்பட்டது. இது நிறுவப்பட்ட நாளான டிசம்பர் 7, 1996 முதல் ஆண்டுதோறும் ‘சர்வதேச சிவில் விமானப் போக்குவரத்து தினமாக’ கொண்டாடப்படுகிறது.
இந்நிலையில், ஐசிஏஓவின் 80-வது ஆண்டு விழா மற்றும் சர்வதேச சிவில் விமான போக்குவரத்து தினம் நேற்று சென்னை விமான நிலையத்தில் கொண்டாடப்பட்டது. இந்நிகழ்ச்சியை ஏரோநாட்டிக்ஸ், ஆஸ்ட்ரோனாட்டிக்ஸ் மற்றும் ஏவியேஷன் நிறுவனம் (IAAA) ஏற்பாடு செய்துள்ளது. ‘இந்து தமிழ் திசை’ நாளிதழும், தமிழக அரசின் ஸ்டார்ட்அப் நிறுவனமான டிஎன் நிறுவனமும் இணை பங்குதாரர்களாக செயல்பட்டன.
இந்நிகழ்ச்சியில் பேசிய சென்னை விமான நிலைய இயக்குநர் சி.வி. தீபக் கூறுகையில், “ஐசிஏஓ என்பது உலகம் முழுவதும் விமான போக்குவரத்தை முன்னின்று நடத்தும் அமைப்பு. அதன் 80-வது ஆண்டு விழாவானது ‘பாதுகாப்பான வானம்; நிலையான எதிர்காலம்’. ஏரோநாட்டிக் துறைக்கு பிரகாசமான எதிர்காலம் உள்ளது. எனவே, இளைஞர்கள் இத்துறையை ஆர்வத்துடன் பார்க்க வேண்டும்” என்றார்.
பேசிய ஐஏஏஏ தலைவர் சி.யு. ஹரி கூறும்போது, “வரும் ஆண்டுகளில் தற்போதைய நிலையை விட விமானப் போக்குவரத்துத் துறை வளர்ச்சி அடையும். எனவே, இத்துறையில் உள்ள வாய்ப்புகளை மாணவர்கள் பயன்படுத்திக் கொள்ள வேண்டும்” என்றார். நிகழ்ச்சியில் சிறப்பு விருந்தினராகப் பங்கேற்ற தமிழ்நாடு சிறு, குறு மற்றும் நடுத்தரத் தொழில் துறை இணை இயக்குநர் இ.பாஸ்கரன், ஸ்டார்ட்அப் தொடங்குவதற்கான வாய்ப்புகள், அரசு நலத்திட்டங்கள், வங்கிக் கடன் உள்ளிட்ட அம்சங்கள் குறித்து விரிவான விளக்கம் அளித்தார்.
இந்நிகழ்ச்சியில் ஐஏஏஏ பொதுச்செயலாளர் சி.எஸ்.கருணாகரன் பேசுகையில், ”அன்னிய நேரடி முதலீட்டில் தமிழகம் மேலும் வளர வேண்டும். தற்போது எங்களின் பங்களிப்பு 5 சதவீதம் மட்டுமே. இதை அதிகரிக்க, விண்வெளி ஸ்டார்ட்அப்களை முறைப்படுத்தி அடுத்த கட்டத்திற்கு கொண்டு செல்ல வேண்டும். இதற்காக இந்த நாளில் சிறந்த வளர்ந்து வரும் ஸ்டார்ட்அப் நிறுவனங்கள் தேர்வு செய்யப்பட்டு விருதுகள் வழங்கப்பட்டுள்ளன” என்றார்.
விழாவின் முடிவில், விண்வெளி ஆராய்ச்சியை ஊக்குவிக்கும் சிறந்த உயர்கல்வி நிறுவனங்கள் பிரிவில் சத்தியபாமா டீம்ட் பல்கலைக்கழகம், ராஜலட்சுமி பொறியியல் கல்லூரி, பாரத் டீம்ட் பல்கலைக்கழகம், ரெமோ கல்லூரிகளுக்கு விருதுகள் வழங்கப்பட்டன. இதேபோல், சிறந்த இன்குபேட்டர் ஸ்டார்ட்அப்கள் பிரிவில் சவிதா நிகர்நிலைப் பல்கலைக்கழகம், அண்ணா பல்கலைக்கழகம், பெரியார் மணியம்மை அறிவியல் மற்றும் தொழில்நுட்பக் கல்லூரி ஆகியவற்றுக்கு விருதுகள் வழங்கப்பட்டன.
மேலும், சிறந்த ஸ்டார்ட்அப்கள் பிரிவில் ஏவியோனிக்ஸ், யாழி, புல்லினம் ஆகிய நிறுவனங்களுக்கு விருதுகள் வழங்கப்பட்டன. முன்னதாக சர்வதேச விமான தினத்தையொட்டி பள்ளி மாணவர்களுக்கு வினாடி-வினா மற்றும் விவாதப் போட்டிகள் நடத்தப்பட்டன. வெற்றி பெற்றவர்களுக்கு பரிசுகள் வழங்கப்பட்டன. நிகழ்ச்சியில் பள்ளி மாணவ, மாணவிகள், ஆசிரியர்கள் உள்பட பலர் கலந்து கொண்டனர். அடுத்த நிகழ்ச்சி டிசம்பர் 11-ம் தேதி தஞ்சாவூரில் நடைபெறவுள்ளது குறிப்பிடத்தக்கது.
