சென்னை: பிரிட்டிஷ் ஏர்வேஸ் சென்னை-லண்டன்-சென்னை இடையே தினசரி விமானங்களை இயக்குகிறது. இந்த விமானம் லண்டன் பயணிகள் மட்டுமல்ல, நெதர்லாந்து, ஸ்காட்லாந்து, பிரான்ஸ் மற்றும் ஸ்வீடன் உள்ளிட்ட பல்வேறு நாடுகளுக்குச் செல்லும் பயணிகளையும் ஏற்றிச் செல்கிறது. எனவே, இந்த விமானம் எப்போதும் பயணிகளால் நிரம்பி வழிகிறது. லண்டனில் இருந்து புறப்படும் பிரிட்டிஷ் ஏர்வேஸ் விமானம் வழக்கமாக அதிகாலை 3.30 மணிக்கு சென்னைக்கு வந்து பின்னர் அதிகாலை 5.35 மணிக்கு சென்னையில் இருந்து லண்டனுக்குப் புறப்படும்.
அதன்படி, நேற்று முன்தினம் இரவு 360 பயணிகளுடன் லண்டனில் இருந்து சென்னைக்கு புறப்பட்ட பிரிட்டிஷ் ஏர்வேஸ் விமானத்தில் நடுவானில் புறப்பட்ட சிறிது நேரத்திலேயே மின் கோளாறு ஏற்பட்டது. இதைத் தொடர்ந்து, விமானம் உடனடியாகத் திரும்பி லண்டன் ஹீத்ரோ விமான நிலையத்தில் அவசரமாக தரையிறக்கப்பட்டது. எனவே, நேற்று அதிகாலை 3.30 மணிக்கு சென்னைக்கு வரவிருந்த பிரிட்டிஷ் ஏர்வேஸ் விமானமும், நேற்று அதிகாலை 5.35 மணிக்கு லண்டனில் இருந்து புறப்படவிருந்த சென்னையில் இருந்து லண்டன் செல்லும் விமானமும் ரத்து செய்யப்பட்டுள்ளதாக அறிவிக்கப்பட்டது.
இதனால், லண்டனில் இருந்து சென்னைக்கு வரவிருந்த 366 பயணிகளும், சென்னையில் இருந்து லண்டனுக்கு புறப்படவிருந்த 366 பயணிகளும் பாதிக்கப்பட்டனர். இது குறித்து கேட்டபோது, சென்னை விமான நிலைய அதிகாரிகள், “அகமதாபாத் விமான விபத்துக்குப் பிறகு, உலகம் முழுவதும் உள்ள விமான நிலையங்களில், புறப்படுவதற்கு முன் விமான எஞ்சின்கள் 2 அல்லது 3 முறை சரிபார்க்கப்படுகின்றன.
விமான எஞ்சின்களில் சிறிய கோளாறுகள் இருந்தாலும், அவை முழுமையாக சரிசெய்யப்பட்ட பின்னரே விமானங்கள் இயக்கப்படுகின்றன. இதனால்தான் விமானங்கள் தாமதமாகின்றன; அவை ரத்து செய்யப்படுகின்றன” என்று தெரிவித்தனர்.
