சென்னை: பூந்தமல்லியில் இருந்து போரூர் வரை ஒருவழிப்பாதையில் ஓட்டுனர் இல்லாத மெட்ரோ ரயில் சோதனை ஓட்டத்தை ஏப்ரல் 30-ம் தேதிக்குள் நடத்த திட்டமிடப்பட்டுள்ளதாக சென்னை மெட்ரோ ரயில் கழக அதிகாரிகள் தெரிவித்தனர். சென்னை மெட்ரோ ரயில் திட்டத்தின் 2-வது கட்டப் பணிகள் 3 வழித்தடங்களில் ரூ. 63,246 கோடி மற்றும் 116 கி.மீ. இதில், கலங்கரை விளக்கம் – பூந்தமல்லி வரையிலான 4-வது வழித்தடத்தின் ஒரு பகுதியாக, பூந்தமல்லி பணிமனை முதல் முல்லை தோட்டம் வரை 2.5 கி.மீ.,க்கு சோதனை ஓட்டம் கடந்த ஜனவரி 20-ம் தேதி வெற்றிகரமாக நடத்தப்பட்டது.
இதையடுத்து பூந்தமல்லியில் இருந்து போரூர் வரை ஏப்ரல் இறுதிக்குள் சோதனை ஓட்டம் நடத்த திட்டமிடப்பட்டுள்ளது. சென்னை மெட்ரோ ரயில் கழக அதிகாரிகள் கூறியதாவது:- 4-வது வழித்தடத்தின் ஒரு பகுதியாக, பூந்தமல்லியில் இருந்து போரூர் வரையிலான மெட்ரோ ரயில் சேவையை, இந்தாண்டு டிசம்பரில், பொதுமக்கள் பயன்பாட்டுக்கு கொண்டு வர இலக்கு நிர்ணயிக்கப்பட்டுள்ளது. இதில், ஒற்றையடிப் பாதையில் (மேல் தடம்) தண்டவாளங்கள் அமைக்கும் பணி நிறைவடைந்துள்ளது.
உயர்மட்ட மின் பாதை அமைக்கும் பணி 90 சதவீதம் நிறைவடைந்துள்ளது. மீதமுள்ள பணிகள் 10 நாட்களுக்குள் முடிக்கப்படும். தொடர்ந்து, தொழில்நுட்ப ஆய்வு நடத்தப்பட்டு, குறைபாடுகள் இருந்தால் சரி செய்யப்படும். இதையடுத்து, பூந்தமல்லி – போரூர் சந்திப்பு வரையிலான ஒற்றையடிப் பாதையில் ஏப்ரல் 30-ம் தேதிக்குள் சோதனை ஓட்டம் நடத்தப்படும். மறு பாதையில் (கீழ் பாதை) தண்டவாளங்கள் அமைக்கும் பணியும், உயர்மட்ட மின் பாதை அமைக்கும் பணியும் வேகமாக நடந்து வருகிறது.
ஒரு மாதத்தில் தண்டவாளங்கள் அமைக்கும் பணி முழுவதும் முடிக்கப்படும். இதையடுத்து, உயர்மட்ட மின் பாதை அமைக்கும் பணி நிறைவடையும். ஜூன் 15-ம் தேதிக்கு பிறகு அதிவேக சோதனை ஓட்டம் நடத்த வாய்ப்பு உள்ளது, என்றனர்.
