திருப்பூர்: திருப்பூர் நகர போலீஸ், 2014-ல் மாநகரமாக உருவானபோது உருவாக்கப்பட்டது. இடப்பற்றாக்குறையால், சிறுபூலுவப்பட்டி பகுதியில் தற்காலிகமாக இயங்கி வந்த, திருப்பூர் நகர போலீஸ் கமிஷனர் அலுவலகம், திருப்பூர் நகரின் முக்கிய பகுதியான திருப்பூர் குமார் நகர் பகுதியில், அனைத்து வசதிகளுடன் கட்டப்பட்டு, கடந்த ஆண்டு, தமிழக முதல்வர் காணொலி மூலம் திறந்து வைத்தார். இந்நிலையில் திருப்பூர் மாநகர காவல்துறையின் கீழ் திருப்பூர் வடக்கு, தெற்கு, வீரபாண்டி, நல்லூர், சென்ட்ரல் காவல் நிலையங்கள், 15 வேலம்பாளையம், அனுப்பர்பாளையம், திருமுருகன்பூண்டி காவல் நிலையங்கள் இயங்கி வந்த நிலையில், மங்கலம் காவல் நிலையமும் திருப்பூர் நகர காவல் நிலையத்துடன் இணைக்கப்பட்டது.
நகரின் வளர்ச்சிக்கு ஏற்றவாறு விரிவாக்கம் செய்யப்படாததால் சில காவல் நிலையங்கள் இட நெருக்கடியை சந்தித்து வருகின்றன. திருப்பூர், பழமையான தெற்கு போலீஸ் ஸ்டேஷன், இட நெருக்கடியை சந்தித்து வருகிறது. திருப்பூர் தாராபுரம் ரோட்டில் கோட்டை மாரியம்மன் கோவில் அருகே தெற்கு போலீஸ் ஸ்டேஷன் செயல்படுகிறது. திருவிழா மற்றும் பொதுக்கூட்டம் நடத்த அனுமதி பெறவும், ஜாமீனில் இருப்பவர்களிடம் கையெழுத்திடவும், பல்வேறு பிரச்னைகள் குறித்து புகார் அளிக்கவும் தினமும் நூற்றுக்கணக்கானோர் வந்து செல்லும் பகுதியாக தெற்கு காவல் நிலைய எல்லைக்கு உட்பட்ட பகுதி உள்ளது.
ஆனால், இதற்கு இடமில்லை. போலீசாருக்கே இடவசதி இல்லாததால், போலீஸ் ஸ்டேஷன் வளாகத்துக்கு வெளியே மேற்கூரை அமைத்து, போலீஸ் நிலையத்துக்கு வரும் பொதுமக்களிடம் குறைகள், குறைகளை கேட்டறிந்து வருகின்றனர். இந்நிலையில், தெற்கு போலீஸ் ஸ்டேஷன் எல்லைக்கு உட்பட்ட பகுதியில் பல்வேறு வழக்குகளில் பறிமுதல் செய்யப்பட்ட வாகனங்கள், போலீஸ் ஸ்டேஷன் வெளியே, போக்குவரத்து சாலையை ஆக்கிரமித்து வரிசையாக நிறுத்தப்படுகின்றன.
எந்த வித பாதுகாப்பு வசதியும் இல்லாமல் நிறுத்தப்படும் இந்த வாகனங்கள் வெயிலில் காய்ந்தும், மழையில் நனைந்தும் மீண்டும் பயன்படுத்த முடியாத நிலை ஏற்பட்டுள்ளது. அவற்றை முற்றிலும் பயன்படுத்த முடியாத நிலையில் வேறு பாதுகாப்பான இடத்துக்கு மாற்ற வேண்டும் என சமூக ஆர்வலர்கள் வலியுறுத்தி வருகின்றனர். மேலும், காவல் நிலையத்திற்கு வரும் பொதுமக்களின் வாகனங்கள், காவலர்களின் இருசக்கர வாகனங்கள் முதல் ஜீப் வரை, தாராபுரம் சாலையில் காவல் நிலையம் வெளியே நிறுத்தப்படுவதால், மத்திய பேருந்து நிலையம் உள்ளிட்ட பகுதிகளில் இருந்து வரும் வாகனங்கள் தெற்கு காவல் நிலையத்தை கடக்கும்போது கடும் போக்குவரத்து நெரிசல் ஏற்படுகிறது.
இது குறித்து காவலர் ஒருவர் கூறுகையில், “போலீஸ் ஸ்டேஷனில் நாளுக்கு நாள் இடப்பற்றாக்குறை நிலவுகிறது. உயர் அதிகாரிகள் மூலம் மாற்று இடம் கண்டறியப்பட்டு வருகிறது. விரைவில் இங்கிருந்து மாற்று இடத்தில் போலீஸ் ஸ்டேஷன் செயல்படும்,” என்றார்.
