காரைக்கால்: காரைக்கால் மாவட்டத்தில் உள்ள ஓஎன்ஜிசி (எண்ணெய் மற்றும் இயற்கை எரிவாயு கழகம்) காவிரி சொத்து மேலாண்மை அலுவலக வளாகத்தில் நேற்று சுதந்திர தின விழா கொண்டாடப்பட்டது. விழாவில், ஓஎன்ஜிசி நிர்வாக இயக்குநரும் காவிரி சொத்து மேலாளருமான உதய் பாஸ்வான் தேசியக் கொடியை ஏற்றி வைத்து, போலீசார் மற்றும் பள்ளி மாணவர்களின் அணிவகுப்பு மரியாதையை ஏற்றுக்கொண்டார்.
பின்னர், அவர் கூறியதாவது:- ஓஎன்ஜிசி-யின் எண்ணெய் உற்பத்தி ஒரு நாளைக்கு 700 டன்னிலிருந்து 600 டன்னாகக் குறைந்துள்ளது. பாதுகாக்கப்பட்ட வேளாண் மண்டலச் சட்டத்தின் காரணமாக, பராமரிப்புப் பணிகளைக் கூட மேற்கொள்ள முடியாது. டெல்டா அல்லாத மாவட்டமான ராமநாதபுரம் மாவட்டத்தில் புதிய துளையிடுதலுக்கான பொது ஆலோசனைக் கூட்டத்தை நடத்த அனுமதி பெறப்படவில்லை.
எனவே, துளையிடும் பணிகளை மேற்கொள்ள முடியாது. ஆலோசனைக் கூட்டம் நடத்த தமிழக அரசு அனுமதி வழங்க வேண்டும். நிலக்கரிக்கு பதிலாக, இயற்கை எரிவாயுவைப் பயன்படுத்தி மின்சாரம் தயாரிக்கலாம். இது சுற்றுச்சூழலைப் பாதிக்காது. பொருளாதார முன்னேற்றம் ஏற்படும்.
பசுமை ஆற்றல் எனப்படும் சூரிய சக்தி மற்றும் காற்றாலை மூலம் மின்சாரம் உற்பத்தி செய்யும் ஆலைகளில் ஓஎன்ஜிசி முதலீடு செய்கிறது. இவ்வாறு அவர் பேசினார். தொடர்ந்து, ஓஎன்ஜிசி பொதுப் பள்ளி மாணவர்களின் கலை நிகழ்ச்சிகள் நடத்தப்படுகின்றன.
