சென்னை: சென்னையில், விமான நிலையம் முதல் விம்கோ நகர் வரையிலும், பரங்கிமலை முதல் சென்னை சென்ட்ரல் வரையிலும் 54 கி.மீ தூரத்திற்கு மெட்ரோ ரயில்கள் இயக்கப்படுகின்றன. இந்த ரயில்களில் தினமும் சுமார் 3 லட்சம் பேர் பயணிக்கின்றனர். வேகமான மற்றும் பாதுகாப்பான பயணம் காரணமாக, மெட்ரோ ரயில்களில் பயணிப்பவர்களின் எண்ணிக்கை அதிகரித்து வருகிறது.
இதற்கிடையில், மெட்ரோ ரயில் திட்டத்தின் 2-வது கட்டம் 116.1 கி.மீ தூரத்தை உள்ளடக்கிய 3 வழித்தடங்களில் செயல்படுத்தப்படுகிறது. இந்த திட்டம் முடிவடைந்து ரயில் சேவை தொடங்கும் போது, மெட்ரோ ரயில்களில் பயணிப்பவர்களின் எண்ணிக்கை 10 லட்சத்தை எட்டும் என்று எதிர்பார்க்கப்படுகிறது. இந்த சூழ்நிலையில், மெட்ரோ ரயில் சேவைகளை மேம்படுத்தவும் சிறந்த சேவையை வழங்கவும் பயணிகளிடமிருந்து கருத்துகளைக் கேட்க மெட்ரோ ரயில் நிறுவனம் ஒரு கணக்கெடுப்பை நடத்தி வருகிறது. இதுகுறித்து, சென்னை மெட்ரோ ரயில் நிறுவன அதிகாரிகள் கூறியதாவது:-
மெட்ரோ ரயில்களில் பயணிகளின் எண்ணிக்கையை அதிகரிக்க நடவடிக்கை எடுக்கப்பட்டு வருகிறது. மேலும், பயணிகளுக்கான வசதிகளை மேம்படுத்த, https://chennaimetrorail.org/ என்ற இணையதளத்தில் ஆண்டுதோறும் கருத்துக் கணிப்பு நடத்தப்படுகிறது. அந்த வகையில், இந்த ஆண்டு மொத்தம் 28 கேள்விகள் கொண்ட ஆன்லைன் கருத்துக் கணிப்பு நடத்தப்படுகிறது. மேலும், QR குறியீட்டை ஸ்கேன் செய்து அதில் உள்ள கேள்விகளுக்கு பதிலளிக்கவும் கேட்டுக் கொண்டுள்ளோம். இந்தப் பணி மே 19 வரை நடத்தப்படும். மெட்ரோ ரயில் பற்றிய தகவல்களைப் பெறுவது எளிதானதா?
மெட்ரோ ரயில் உடனடியாக வருகிறதா? பயணக் கட்டணம் செலுத்துவது எளிதானதா? மெட்ரோ நிலையங்கள் மற்றும் ரயில்கள் சுத்தமாகவும் வசதியாகவும் உள்ளதா? பல்வேறு முக்கியமான கேள்விகள் கேட்கப்பட்டுள்ளன. மேலும், பயணிகளின் பணி நிலை, பாலினம், வயது, மெட்ரோவில் பயணித்த நேரம், மெட்ரோ நிலையத்திற்கும் வீட்டிற்கும் இடையிலான தூரம், மெட்ரோ ரயில்களின் இயக்க நேரம் எப்படி? போதுமான இடம் உள்ளதா? பயணிகளின் கருத்துக்கள் புள்ளிவிவரங்களாக சேகரிக்கப்பட்டு பகுப்பாய்வு செய்யப்படும். இதன் அடிப்படையில், மெட்ரோ ரயில் சேவையை மேம்படுத்த அடுத்த கட்ட நடவடிக்கை எடுக்கப்படும். இவ்வாறு அவர்கள் கூறினார்.
