பிளஸ் 1 பொதுத் தேர்வு எழுதும் பள்ளி மாணவர்களுக்கான ஹால் டிக்கெட் இன்று மதியம் வெளியிடப்படுகிறது. தமிழக பள்ளிக் கல்வி பாடத்திட்டத்தில் பிளஸ் 1 படிக்கும் மாணவர்களுக்கான பொதுத்தேர்வு மார்ச் 5 முதல் 27 வரை நடக்கிறது. இந்த தேர்வை 3 லட்சத்து 89,423 மாணவர்கள், 4 லட்சத்து 28,946 மாணவிகள், 4,755 தனித்தேர்வர்கள், 137 கைதிகள் என மொத்தம் 8 லட்சத்து 23,261 பேர் எழுதவுள்ளனர்.
தனித்தேர்வர்களுக்கான ஹால் டிக்கெட் பிப்., 14ல் வெளியிடப்பட்டது. இதையடுத்து பள்ளி மாணவர்களுக்கான ஹால் டிக்கெட் இன்று மதியம் வெளியிடப்படுகிறது. பள்ளி தலைமையாசிரியர்கள் தேர்வுத்துறையின் http://www.dge.tn.gov.in/ என்ற இணையதளத்தை பார்வையிட்டு மாணவர்களின் ஹால் டிக்கெட்டை பதிவிறக்கம் செய்ய வேண்டும். மாணவர்கள் விவரங்கள் சரியாக உள்ளதா என்பதை உறுதிசெய்து பின்னர் அவற்றை விநியோகிக்க வேண்டும்.
திருத்தங்கள் இருப்பின், அந்த விவரங்களை மாவட்ட தேர்வு அலுவலகங்களில் தெரிவிக்க வேண்டும் என தேர்வுத்துறை தெரிவித்துள்ளது. 10-ம் வகுப்பு மாணவர்களுக்கான ஹால் டிக்கெட் இம்மாத இறுதிக்குள் வெளியிட திட்டமிடப்பட்டுள்ளதாக தேர்வுத்துறை அதிகாரிகள் தெரிவித்தனர்.
