ஊட்டி: நீலகிரி மாவட்டத்தில், தேயிலைக்கு அடுத்தபடியாக மலை காய்கறி விவசாயம் இரண்டாவது பெரிய பயிராக உள்ளது. இங்கு உருளைக்கிழங்கு, பீட்ரூட், பீன்ஸ், முட்டைகோஸ், முள்ளங்கி உள்ளிட்ட பல்வேறு மலை காய்கறிகள் பயிரிடப்படுகின்றன. இருப்பினும், உருளைக்கிழங்கு மற்றும் கேரட் அதிக அளவில் பயிரிடப்படுகிறது. நீலகிரி மாவட்டத்தில் விளைவிக்கப்படும் உருளைக்கிழங்கு சுவை அதிகம் என்பதால், அதிக விலை கிடைப்பது வழக்கம்.
இதனால் வெளிமாவட்டங்களுக்கும், வெளி மாநிலங்களுக்கும் அதிக அளவில் உருளைக்கிழங்கு கொண்டு செல்லப்பட்டு விற்பனை செய்யப்படுகிறது. நீலகிரி மாவட்டம் ஊட்டி சுற்றுவட்டார பகுதிகளான முத்தோரை பாலாடை, கேத்தி பாலடா, கொல்லிமலை, கோலனிமட்டம் உள்ளிட்ட பகுதிகளில் கடந்த 3 மாதங்களுக்கு முன் உருளைக்கிழங்கு பயிரிடப்பட்டது.
நல்ல மகசூல் கிடைத்ததை அடுத்து தற்போது அறுவடை தொடங்கியுள்ளது. குளிரையும் பொருட்படுத்தாமல் விவசாயிகள் அதிகாலையில் உருளைக்கிழங்கு பயிர்களை அறுவடை செய்து வருகின்றனர். நீலகிரி மாவட்டத்தில் விளையும் உருளைக்கிழங்குக்கு கணிசமான விலை கிடைத்து வருகிறது. 45 கிலோ எடையுள்ள உருளைக்கிழங்கு மூட்டை ரூ. 1400 முதல் ரூ. 1800 வரை விலை கிடைத்து வருகிறது. இந்நிலையில் தற்போது மாவட்டத்தின் அனைத்து பகுதிகளிலும் உருளைக்கிழங்கு அறுவடை செய்யும் பணியில் விவசாயிகள் மும்முரமாக ஈடுபட்டுள்ளனர்.
