இளங்கலை, முதுகலை படிப்புகளில் சேருவதற்கு பின்பற்ற வேண்டிய வரைவு வழிகாட்டுதல் வெளியீடு..!!

சென்னை: பல்கலைக்கழக மானியக் குழு (யுஜிசி) இளங்கலை மற்றும் முதுகலை படிப்புகளில் சேருவதற்கு பின்பற்ற வேண்டிய வரைவு வழிகாட்டுதல்களை வெளியிட்டுள்ளது. அதில் கூறப்பட்டுள்ளதாவது:- உயர்கல்வி நிறுவனங்கள் ஜூலை/ஆகஸ்ட் மற்றும் ஜனவரி/பிப்ரவரி மாதங்களில் ஆண்டுக்கு இருமுறை சேர்க்கை நடத்தலாம். உள்கட்டமைப்பு வசதிகள் மற்றும் ஆசிரியர்களின் எண்ணிக்கையைப் பொறுத்து அந்தந்தப் படிப்புகளில் சேர்க்கப்படும் மாணவர்களின் எண்ணிக்கையை உயர்கல்வி நிறுவனமே தீர்மானிக்க முடியும்.

உயர்கல்வி, தொழிற்கல்வி, பயிற்சி, திறன் மேம்பாடு, இன்டர்ன்ஷிப் அனைத்தையும் ஒட்டுமொத்த பாடத்திட்டத்தில் ஒருங்கிணைக்க முடியும். மாணவர்கள் விரும்பினால் படிப்பை நிறுத்திவிட்டு தொடர வாய்ப்பளிக்க வேண்டும். இளங்கலை பட்டப்படிப்பு அல்லது ஒருங்கிணைந்த இளங்கலை மற்றும் முதுகலை பட்டப்படிப்பில் சேர, பிளஸ் 2 தேர்ச்சி பெற்றிருக்க வேண்டும்.

பிளஸ் 2வில், அறிவியல், கணிதம், வணிகம் போன்ற பாடங்களை தேர்வு செய்திருந்தாலும், விரும்பும் இளங்கலை பட்டப்படிப்பில் சேரலாம். இதற்கு தேசிய அளவில் அல்லது பல்கலைக்கழக அளவில் நடத்தப்படும் நுழைவுத் தேர்வில் தேர்ச்சி பெற்றால் போதும். உயர்கல்வி நிறுவனங்கள் குறிப்பிட்ட எண்ணிக்கையிலான மாணவர்களை நேரடியாக இரண்டாம் ஆண்டு இளங்கலை மற்றும் முதுகலை படிப்பில் சேர்க்கலாம், நிறுவனங்களில் போதுமான கல்வி மற்றும் அடிப்படை வசதிகள் இருந்தால் மாணவர்கள் ஒரே நேரத்தில் இரண்டு இளங்கலை படிப்புகள் மற்றும் இரண்டு முதுகலை படிப்புகள் படிக்கலாம்.

தன்னாட்சி அமைப்புகளின் ஒப்புதலுடன் மாணவர்களின் குறைந்தபட்ச வருகைத் தேவையை உயர்கல்வி நிறுவனங்கள் தீர்மானிக்கலாம். இளங்கலைப் படிப்புகளின் காலம் 3 அல்லது 4 வருடங்களாகவும், முதுகலை படிப்புகளின் காலம் 1 அல்லது 2 வருடங்களாகவும் இருக்கும். 4 வருட இளங்கலைப் படிப்பை முடிப்பவர்கள் ஒரு வருட முதுநிலைப் படிப்பில் சேரலாம். இவ்வாறு அதில் கூறப்பட்டுள்ளது.

மேற்கண்ட அனைத்து அம்சங்களும் மத்திய அரசின் புதிய தேசிய கல்விக் கொள்கையில் உள்ளன. புதிய தேசிய கல்விக் கொள்கை தமிழகத்தில் அமல்படுத்தப்படவில்லை. மாநில நடைமுறைப்படி, உயர்கல்வி நிறுவனங்களுக்கான மாணவர் சேர்க்கை ஆண்டுக்கு ஒருமுறை மட்டுமே, அதாவது ஜூன் மாதத்தில் நடைபெறும். மேலும், இளங்கலைப் படிப்பின் காலம் 3 ஆண்டுகள் மட்டுமே. அதேபோல, பிளஸ் 2வில் படித்த படிப்பைப் பொறுத்து, பட்டப் படிப்பைத் தேர்வு செய்யலாம் என்பது குறிப்பிடத்தக்கது.