சென்னை: கருணாநிதி நாணயம் வெளியிட்டதற்கு வாழ்த்து தெரிவித்த காங்கிரஸ் தலைவர் ராகுல் காந்திக்கு முதல்வர் மு.க.ஸ்டாலின் நன்றி தெரிவித்துள்ளார். கருணாநிதி நினைவு நாணயம் வெளியிடுவது குறித்து ராகுல் தனது எக்ஸ் தளத்தில், “தமிழக மக்களுக்கு எனது அன்பான வணக்கங்களை தெரிவித்துக் கொள்கிறேன்.
கருணாநிதியின் அசாதாரண வாழ்க்கையை போற்றும் வகையில் நினைவு நாணயம் வெளியிடப்படுவதை அறிந்து மகிழ்ச்சி அடைகிறேன். கலைஞர் கருணாநிதியின் சமூக முற்போக்கு பார்வையும், மக்களுக்கு அதிகாரம் அளிப்பதில் அவர் கொண்டிருந்த தளராத அர்ப்பணிப்பும் கோடிக்கணக்கான மக்கள் கண்ணியமாக வாழ வழி வகுத்தது. அவரது தீர்க்கமான தலைமையின் கீழ்தான் தமிழ்நாடு ஒரு தைரியமான மற்றும் லட்சியமான மாற்றத்திற்கான பாதையில் இறங்கியது.
அவரது கருத்தியல் தெளிவும் மாற்றத்திற்கான அர்ப்பணிப்பும் தமிழ்நாடு பல்வேறு துறைகளில் தன்னை ஒரு முன்னோடியாக உறுதியாக நிலைநிறுத்த உதவியது மற்றும் பல மாநிலங்களை பெரிய கனவு காண தூண்டியது. இந்த நேரத்தில் முதல்வர் மு.க.ஸ்டாலினையும் பாராட்டுகிறேன். இந்தியாவை பாதுகாப்பதில் ஸ்டாலினுக்கு அசைக்க முடியாத உறுதி உள்ளது.
ராகுல் காந்திக்கு நன்றி தெரிவிக்கும் விதமாக, முதல்வர் ஸ்டாலின் தனது எக்ஸ் தளத்தில், “நன்றி அன்பு அண்ணா. கலைஞரின் கனவை நனவாக்க நாங்கள் தொடர்ந்து பாடுபடுவோம்” என்றார்.
