சென்னை: சென்னை, புறநகர் அரசு மருத்துவமனைகளுக்குள் மழைநீர் புகுந்ததால், பிரசவித்த தாய், குழந்தைகள், நோயாளிகள் கடும் அவதிக்குள்ளாகினர். ஒவ்வொரு ஆண்டும் மழைக்காலங்களில் சென்னை மற்றும் புறநகர் பகுதிகளில் உள்ள அரசு மருத்துவமனைகளில் மழைநீர் தேங்கி நோயாளிகள் அவதிப்படுகின்றனர். அதன்படி, இந்த ஆண்டு பெஞ்சல் சூறாவளியால் பெய்த கனமழையால் சென்னை எழும்பூர் அரசு மகப்பேறு மருத்துவமனையின் தரை தளத்தில் உள்ள புறநோயாளிகள் பிரிவில் மழைநீர் புகுந்தது.
இதேபோல், சுகப்பிரசவத்திற்கு பின் மழைநீர் வார்டுகளுக்குள் புகுந்ததால், குழந்தைகளுடன் தாய்மார்கள் அவதிப்பட்டனர். இதையடுத்து அவர்களுக்கு உடனடியாக மாற்று வார்டு ஒதுக்கப்பட்டது. இதேபோல் அருகில் உள்ள அரசு குழந்தைகள் நல மருத்துவமனைகளிலும் மழைநீர் தேங்கியது. இதனால் குழந்தைகளுடன் சிகிச்சைக்கு வரும் பெற்றோர்கள் சிரமப்பட்டனர். மழைநீரை அகற்ற உரிய பணியாளர்கள் இல்லை என மருத்துவர்கள், செவிலியர்கள் புகார் தெரிவித்தனர்.
தாம்பரம், பல்லாவரம், குரோம்பேட்டை உள்ளிட்ட சென்னை புறநகர் பகுதிகளில் உள்ள சாலைகளில் மழைநீர் பெருக்கெடுத்து ஓடுகிறது. அரசு இருதய மருத்துவமனையில் மழைநீர் தேங்கி குளம் போல் காட்சியளிக்கிறது. தாம்பரம் ஜிலாஸ் சாலையில் உள்ள குரோம்பேட்டை அரசு மருத்துவமனைக்குள் மழைநீர் செல்லாமல் இருக்க நுழைவு வாயிலில் மணல் மூட்டைகள் வைக்கப்பட்டுள்ளன. குரோம்பேட்டை அரசு மருத்துவமனையின் தரை தளம் முழுவதும் மழைநீர் தேங்கியதால், அங்கிருந்த நோயாளிகள் முதல் தளத்திற்கு மாற்றப்பட்டனர்.
முழங்கால் அளவு தண்ணீர் தேங்கியதால், பொதுமக்கள் மற்றும் நோயாளிகள் மருத்துவமனைக்குள் செல்லவோ, வெளியேறவோ முடியாமல் தவித்தனர். தேங்கிய மழைநீரை அகற்றும் பணியில் நகராட்சி ஊழியர்கள் ஈடுபட்டுள்ளனர். மருத்துவமனை வளாகத்திற்குள் மழைநீர் புகுந்தது. ஜிஎஸ்டி சாலையில் ஓடும் மழைநீர் மருத்துவமனை வளாகத்திற்குள் செல்லாமல் இருக்க கேட் முன்பு போலீசார் மணல் மூட்டைகளை அடுக்கி வைத்துள்ளனர்.
