ஸ்ரீவில்லிபுத்தூர்: ஆவின் உள்ளிட்ட அரசுத் துறைகளில் வேலை வாங்கித் தருவதாகக் கூறி ரூ.3 கோடி மோசடி செய்த வழக்கில், முன்னாள் அமைச்சர் ராஜேந்திர பாலாஜி மற்றும் 7 பேர் இன்று ஸ்ரீவில்லிபுத்தூர் ஊழல் தடுப்பு நீதிமன்றத்தில் ஆஜரானார்கள். வழக்கை ஆகஸ்ட் 13-ம் தேதிக்கு ஒத்திவைத்து நீதிபதி ஜெயக்குமார் உத்தரவிட்டார்.
விருதுநகர் மாவட்டம் சாத்தூரைச் சேர்ந்த அதிமுக நிர்வாகி ரவீந்திரன், தனது உறவினருக்கு ஆவினில் வேலை வாங்கித் தருவதாகக் கூறி ரூ.30 லட்சம் வாங்கி ஏமாற்றியதாக அளித்த புகாரின் அடிப்படையில், விருதுநகர் குற்றப்பிரிவு போலீசார், ஆவின் நிர்வாகி விஜய் நல்லதம்பி, முன்னாள் அமைச்சர் கே.டி. ராஜேந்திர பாலாஜி மற்றும் ஆவிலிபுத்தூர் நிர்வாகி மாரியப்பன் ஆகியோர் மீது மோசடி உள்ளிட்ட 3 பிரிவுகளின் கீழ் வழக்குப் பதிவு செய்தனர்.
அதே நாளில், உணவு, கூட்டுறவு, ஆவின், பஞ்சாயத்து செயலாளர் உள்ளிட்ட வேலைகளுக்காக பலரிடம் பணம் பெற்று, ராஜேந்திர பாலாஜிக்கு ரூ.3 கோடி வழங்கியதாக அதிமுக நிர்வாகி விஜய் நல்லதம்பி அளித்த புகாரின் பேரில், முன்னாள் அமைச்சர் ராஜேந்திர பாலாஜி மற்றும் அவரது உதவியாளர்கள் பாபுராஜ், பலராமன் மற்றும் முத்துப்பாண்டி ஆகியோர் மீது மோசடி உட்பட 4 பிரிவுகளின் கீழ் குற்றப்பிரிவு போலீசார் வழக்குப் பதிவு செய்தனர்.
இந்த வழக்கில், ராஜேந்திர பாலாஜி மற்றும் பிறருக்கு எதிராக ஸ்ரீவில்லிபுத்தூர் நீதிமன்றத்தில் ஜனவரி 2023-ல் ஆன்லைனில் குற்றப்பத்திரிகை தாக்கல் செய்யப்பட்டது. ஆனால், ஊழல் தடுப்புச் சட்டத்தின் கீழ் வழக்கை விசாரிக்க நீதிபதி உத்தரவிட்டார். ராஜேந்திர பாலாஜி உள்ளிட்டோர் மீது ஊழல் தடுப்புச் சட்டத்தின் கீழ் வழக்குப் பதிவு செய்து விசாரித்த குற்றப்பிரிவு போலீசார், ஏப்ரல் 15-ம் தேதி ஆன்லைனில் குற்றப்பத்திரிகை தாக்கல் செய்தனர்.
மக்கள் பிரதிநிதிகள் மீதான வழக்கு மே 19-ம் தேதி முதன்மை மாவட்ட அமர்வு நீதிமன்றம்/ ஊழல் தடுப்பு சிறப்பு நீதிமன்றத்திற்கு மாற்றப்பட்டது. இந்த வழக்கு ஜூலை 16-ம் தேதி விசாரணைக்கு பட்டியலிடப்பட்டது. அதன்படி, இன்று வழக்கு விசாரணைக்கு வந்தபோது, முன்னாள் அமைச்சர் ராஜேந்திர பாலாஜி உட்பட 7 பேர் ஸ்ரீவில்லிபுத்தூர் ஊழல் தடுப்பு நீதிமன்றத்தில் ஆஜரானார்கள். வழக்கை ஆகஸ்ட் 13-ம் தேதிக்கு ஒத்திவைத்து நீதிபதி ஜெயக்குமார் உத்தரவிட்டார்.
