சென்னை: ”பெண்களை ஆக்கப்பூர்வமாகவும், பாதுகாப்பு சக்தியாகவும் கொண்டாடும் சர்வதேச மகளிர் தினம் நாளை கொண்டாடப்பட உள்ள நிலையில், உலகம் முழுவதும் வாழும் பெண்களுக்கு எனது மனமார்ந்த வாழ்த்துகளைத் தெரிவித்துக் கொள்கிறேன். பெண்கள் பலவீனமானவர்கள் என்ற தவறான நம்பிக்கை உலகில் எங்கும் உள்ளது. ஆண்களை விட பெண்கள் போர்க்குணமிக்கவர்கள். ஆண்கள் தான் வெற்றி பெற்றதாக பெருமிதம் கொண்டாலும், அவர்களின் வெற்றிக்கு பின்னால் இருப்பது பெண்களே.
சங்க காலம் முதல் இன்று வரை பல மாவீரர்களை இதற்கு உதாரணமாகக் கூறலாம். உலகில் பெண்களுக்கு அதிக மரியாதை கொடுக்கும் சமூகம் தமிழ் சமூகம். பெண்களை கடவுளுக்கு மேல் வணங்கும் சமூகமும் தமிழ் சமூகம்தான். மனித நாகரிகங்களின் வளர்ச்சிக்கும், வாழ்வாதாரத்துக்கும், நீர்ப்பாசனத்துக்கும் காரணமான நதிகளுக்குக்கூட பெண்களின் பெயர்கள் சூட்டப்படுவதிலிருந்தே தமிழ்ச் சமூகம் பெண்களை எந்த அளவுக்கு மதித்திருக்கிறது என்பதைப் புரிந்து கொள்ளலாம்.
அதே மரியாதையை நடைமுறை வாழ்க்கையிலும் கொடுக்க வேண்டும். ஆனால், அந்த மரியாதை பெண்களுக்குக் கொடுக்கப்படவில்லை என்பது மட்டுமல்ல, அச்சமின்றி சுதந்திரமாக நடமாடக் கூட முடியாத நிலை தமிழகத்தில் உள்ளது. பாடம் சொல்லித் தர வேண்டிய பள்ளிக்கூடங்கள் கூட இன்று பெண் குழந்தைகளுக்குப் பாதுகாப்பாக இல்லை. பொது இடங்களும் பெண்களுக்கு ஆபத்தான இடங்களாக மாறிவிட்டன. 2023-ம் ஆண்டை விட 2024-ம் ஆண்டில் குழந்தைகளுக்கு எதிராகப் பதிவு செய்யப்பட்ட வழக்குகள், குறிப்பாக சிறுமிகளுக்கு எதிரான பாலியல் குற்றங்கள் 52 சதவீதம் அதிகரித்திருப்பது, பெண்களுக்கு எந்த அளவுக்குப் பாதுகாப்பற்றதாக தமிழ்நாடு மாறியுள்ளது என்பதைக் காட்டுகிறது.
இது உண்மையிலேயே கவலையளிக்கும் செய்தி. பெண்கள் கல்வி மற்றும் வேலைவாய்ப்பில் முன்னேற்றம் அடைந்துள்ளனர். இதற்குக் காரணம் அவர்களின் அறிவும் திறமையும்தான். அவர்களின் எட்டாவது குழந்தையாக அவர்களுக்கு உரிமையும் அதிகாரமும் உள்ளது. அவர்களுக்காக போராடும் திறன் பெண்களுக்கு உள்ளது. பெண்கள் அச்சமின்றி நடமாடும் சூழலை அரசு உருவாக்கினால் மட்டுமே பெண்கள் சாதிக்க முடியும். பெண்களுக்கு பாதுகாப்பான சூழல் உருவாகும் நாளே உண்மையான மகளிர் தினமாகும். இந்நாளில் அதை உருவாக்க அனைவரும் பாடுபட வேண்டும் என்றார்.
