சென்னை: நாடு முழுவதும் 9,970 உதவி ஓட்டுநர் பணியிடங்களை நிரப்புவதற்கான அறிவிப்பை ரயில்வே வெளியிட்டுள்ளது. இதில் தெற்கு ரயில்வேயில் 510 பணியிடங்கள் நிரப்பப்பட உள்ளன. ஏப்ரல் 10-ம் தேதி முதல் விண்ணப்பிக்கலாம் என தெரிவிக்கப்பட்டுள்ளது. ரயில்வேயில் பல்வேறு பிரிவுகளில் 2 லட்சம் பணியிடங்கள் காலியாக உள்ளன. முதற்கட்டமாக நாடு முழுவதும் 9,970 உதவி ஓட்டுநர் பணியிடங்களை நிரப்புவதற்கான அறிவிப்பை ரயில்வே வெளியிட்டுள்ளது.
அதிகபட்சமாக கிழக்கு கடற்கரை ரயில்வே மண்டலத்தில் 1,461 உதவி ஓட்டுநர் பணியிடங்களும், தெற்கு மத்திய ரயில்வேயில் 989 பணியிடங்களும், மேற்கு ரயில்வேயில் 885 பணியிடங்களும், தென்கிழக்கு ரயில்வேயில் 796 பணியிடங்களும், கிழக்கு ரயில்வேயில் 768 பணியிடங்களும், மேற்கு மத்திய ரயில்வேயில் 759 பணியிடங்களும், கிழக்கு மத்திய ரயில்வேயில் 700 பணியிடங்களும் நிரப்பப்பட உள்ளன.
தெற்கு ரயில்வேயில் 510 பணியிடங்கள் நிரப்பப்பட உள்ளன. இது குறித்து ரயில்வே அதிகாரிகள் கூறியதாவது: 10ம் வகுப்பு தேர்ச்சியுடன் ஐடிஐ டிப்ளமோ, பி.இ., பி.டெக் முடித்தவர்கள் விண்ணப்பிக்கலாம். மெக்கானிக்கல், எலக்ட்ரானிக்ஸ், எலக்ட்ரிக்கல், ஆட்டோமொபைல் இன்ஜினியரிங் பிரிவில் டிப்ளமோ, இன்ஜினியரிங் முடித்தவர்கள் விண்ணப்பிக்கலாம்.
ஏப்., 10 முதல் விண்ணப்பிக்கலாம்: கடைசி தேதி மே 9. இதற்கான முழு தகவல் அனைத்து ஆர்ஆர்பி இணையதளங்களிலும் வெளியிடப்படும். இவ்வாறு கூறினார்கள்.
