மஞ்சூர்: நீலகிரி மாவட்டத்தில் உள்ள குந்தா மற்றும் பைக்காரா நீர்மின் திட்டங்களின் கீழ் 12 நீர்மின் நிலையங்கள் இயங்கி வருகின்றன. பவானி, அவலாஞ்சி, கிளான்மார்கான், பைக்காரா, குந்தா உள்ளிட்ட பல்வேறு அணைகளில் தேக்கி வைக்கப்பட்டுள்ள தண்ணீரை பயன்படுத்தி நீர்மின் நிலையங்களில் மொத்தம் 833.65 மெகாவாட் மின்சாரம் உற்பத்தி செய்யப்படுகிறது.
இந்நிலையில், மஞ்சூர் அருகே காட்டுக்குப்பை பகுதியில் புதிய நீரேற்று புனல் மின் நிலையம் அமைக்க நடவடிக்கை எடுக்கப்பட்டது. இதையடுத்து தமிழ்நாடு மின் உற்பத்தி கழகம் சார்பில் ரூ.1,850 கோடி மதிப்பீட்டில் மின் நிலையம் அமைக்கும் பணி தொடங்கப்பட்டு கடந்த சில ஆண்டுகளாக நடைபெற்று வருகிறது. இந்த புதிய சுரங்கப்பாதை மின் நிலையத்தில் தலா 125 மெகாவாட் வீதம் 4 அலகுகளில் மொத்தம் 500 மெகாவாட் மின்சாரம் உற்பத்தி செய்ய நடவடிக்கை எடுக்கப்பட்டுள்ளது.
அதாவது ஒரு நாளைக்கு 3 மில்லியன் யூனிட் வீதம் கூடுதலாக 1,095 மில்லியன் யூனிட் மின்சாரம் கிடைக்கும். அனல்மின் நிலைய கட்டுமானப் பணிகள் தற்போது 60 சதவீதம் நிறைவடைந்துள்ளன. சில முக்கிய பணிகளை கருத்தில் கொண்டு எமரால்டு அணையில் தண்ணீர் திறக்க மின் வாரியம் முடிவு செய்தது.
இதையடுத்து நேற்று காலை ஊட்டி ஆர்டிஓ சதீஷ், குந்தா தாசில்தார் கலைச்செல்வி, குந்தா புனல் உற்பத்தி வட்ட மேற்பார்வை பொறியாளர் முரளி ஆகியோர் முன்னிலையில் எமரால்டு அணையில் இருந்து தண்ணீர் திறக்கப்பட்டது. தொடர்ந்து 30 நாட்களாக வினாடிக்கு 1,000 கன அடி வீதம் தண்ணீர் திறந்து விடப்படுவதாக மின் வாரிய அதிகாரிகள் தெரிவித்தனர்.
அணையில் இருந்து திறக்கப்படும் தண்ணீர் எடக்காடு பிகுளி பாலம் வழியாக குந்தா அணையை வந்தடைகிறது. அவலாஞ்சி அணையில் இருந்து ராட்சத குழாய்கள் மூலம் குந்தா மின் நிலையத்திற்கு வரும் தண்ணீர் மின் உற்பத்தி செய்து அணையில் சேமிக்கப்படுகிறது. இந்நிலையில், எமரால்டு அணையில் இருந்து திறக்கப்பட்ட தண்ணீர் குந்தா அணையிலும் கலப்பதால் குந்தா அணையின் நீர்மட்டம் தனது முழு கொள்ளளவான 89 அடியை எட்டியுள்ளது. இதையடுத்து அவலாஞ்சி அணையில் இருந்து குந்தா மின் நிலையத்திற்கு தண்ணீர் நிறுத்தப்பட்டதுடன், குந்தா மின் நிலையத்திலும் மின் உற்பத்தி தற்காலிகமாக நிறுத்தப்பட்டது.
அதே நேரத்தில் குந்தா அணையில் அமைந்துள்ள சுரங்கப்பாதை வழியாக கெத்தி மின் நிலையத்திற்கு கொண்டு செல்லப்படும் நீரின் அளவு அதிகரிக்கப்பட்டுள்ளது. இதன் மூலம் கெத்தை, பரளி, பில்லூர் மின் நிலையங்களில் 24 மணி நேரமும் மின் உற்பத்தி செய்ய நடவடிக்கை எடுக்கப்பட்டுள்ளதாக அதிகாரிகள் தெரிவித்தனர்.
