சென்னை: பொறியியல் மாணவர் சேர்க்கைக்கான முதல் சுற்று கவுன்சிலிங்கில் 30,552 மாணவர்களுக்கு ஒதுக்கீடு உத்தரவுகள் வழங்கப்பட்டுள்ளன. இதைத் தொடர்ந்து, இரண்டாம் சுற்று கவுன்சிலிங் வரும் 26-ம் தேதி தொடங்க உள்ளது. தமிழ்நாட்டில் உள்ள பொறியியல் கல்லூரிகளில் சேர்க்கைக்கான ஆன்லைன் கவுன்சிலிங் இந்த ஆண்டு 3 சுற்றுகளாக நடத்தப்படுகிறது.
அதன்படி, முதல் சுற்று கவுன்சிலிங் கடந்த 14-ம் தேதி தொடங்கி 18-ம் தேதி முடிவடைந்தது. இதில், 200 முதல் 179 வரை கட்-ஆஃப் மதிப்பெண்கள் பெற்ற 39,145 மாணவர்கள் பங்கேற்க அனுமதிக்கப்பட்டனர். அதில், 36,731 மாணவர்கள் தங்களுக்கு விருப்பமான கல்லூரியைத் தேர்வு செய்தனர், மேலும் 17-ம் தேதி காலை 10 மணிக்கு தற்காலிக ஒதுக்கீடு உத்தரவு வெளியிடப்பட்டது. அதை உறுதிப்படுத்த 18-ம் தேதி மாலை 5 மணி வரை அவர்களுக்கு அவகாசம் வழங்கப்பட்டது.
இந்நிலையில், தற்காலிக ஒதுக்கீட்டை உறுதி செய்த 30,552 மாணவர்களுக்கு நேற்று காலை 10 மணிக்கு இறுதி ஒதுக்கீட்டு உத்தரவு வழங்கப்பட்டது. இறுதி ஒதுக்கீட்டு உத்தரவைப் பெற்ற மாணவர்கள் ஜூலை 23-ம் தேதிக்குள் தங்களுக்கு விருப்பமான பொறியியல் சேர்க்கை மையத்திற்குச் சென்று, அசல் சான்றிதழ்களைச் சமர்ப்பித்து, கல்விக் கட்டணத்தைச் செலுத்த வேண்டும். ஜூலை 23-ம் தேதிக்குள் தங்களுக்கு ஒதுக்கப்பட்ட பொறியியல் கல்லூரிக்குச் சென்று சேர்க்கை நடைமுறைகளை முடிக்குமாறு தமிழ்நாடு பொறியியல் சேர்க்கை செயலாளர் புருஷோத்தமன் அறிவுறுத்தியுள்ளார்.
குறிப்பிட்ட தேதிக்குள் மாணவர்கள் கல்லூரியில் சேரவில்லை என்றால், அவர்களுக்கு ஒதுக்கப்பட்ட இடங்கள் ரத்து செய்யப்பட்டு, அடுத்த காத்திருப்புப் பட்டியலில் உள்ள மாணவர்களுக்கு ஒதுக்கப்படும். தொழில்நுட்பக் கல்வி இயக்குநரகம் ஏற்கனவே அறிவித்தபடி, 2-வது சுற்று கவுன்சிலிங் ஜூலை 26-ம் தேதி தொடங்கி ஜூலை 30-ம் தேதி முடிவடையும்.
