சென்னை: தேசிய தடுப்பூசி அட்டவணையின் கீழ் மொத்தம் 11 வகையான தடுப்பூசிகள் குழந்தைகளுக்கு வழங்கப்படுகின்றன. இத்திட்டத்தின் கீழ் ஆண்டுக்கு 9.40 லட்சம் குழந்தைகளுக்கு தடுப்பூசி போடப்படுகிறது. அரசு ஆரம்ப சுகாதார நிலையங்கள் முதல் மருத்துவக் கல்லூரி மருத்துவமனைகள் வரை 11 ஆயிரத்துக்கும் மேற்பட்ட இடங்களில் தடுப்பூசி போடப்படுகிறது.
இதில், ஆரம்ப சுகாதார நிலையங்களில் வாரம் ஒருமுறை தடுப்பூசி போடப்படுகிறது. இந்நிலையில், முதல் தவணைக்குப் பிறகு, சில குழந்தைகளுக்கு அடுத்த தவணைத் தொகையை பெற்றோர் உரிய நேரத்தில் செலுத்தாததால், 100 சதவீத தடுப்பூசி இலக்கை எட்ட முடியவில்லை. நடப்பாண்டு முடிவடைய உள்ள நிலையில், அனைத்து குழந்தைகளுக்கும் தடுப்பூசி போடுவதை உறுதி செய்ய, பொது சுகாதாரத்துறை சிறப்பு தடுப்பூசி முகாமை நடத்தி வருகிறது.
இதில், பாக்டீரியாவால் பரவும் நிமோனியா, மூளைக்காய்ச்சல் உள்ளிட்ட 5 வகையான நோய்களில் இருந்து குழந்தைகளை பாதுகாக்கும் பென்டாவலன்ட் தடுப்பூசி முகாம் வரும் 31ம் தேதி வரை நடக்கிறது. இதுகுறித்து, தமிழக பொது சுகாதாரத்துறை இயக்குனர் செல்வவிநாயகம் கூறுகையில், ”குழந்தை பிறந்த 4, 10 மற்றும் 14வது வாரங்களில் பெண்டாவலன்ட் தடுப்பூசி போடப்படுகிறது.
உரிய காலத்தில் தடுப்பூசி போடாதவர்களுக்கு, வரும் 31-ம் தேதி வரை அனைத்து ஆரம்ப சுகாதார நிலையங்களிலும் தடுப்பூசி போடப்படும். இதில், பெண்டாவலன்ட் தடுப்பூசி மட்டுமின்றி, ஒருங்கிணைந்த தடுப்பூசி திட்டத்தில் விடுபட்ட மற்ற தடுப்பூசிகளையும் குழந்தைகளுக்கு போட பெற்றோர்கள் முன்வர வேண்டும். இது பல்வேறு நோய்களில் இருந்து குழந்தைகளை பாதுகாக்க உதவும். இவ்வாறு அவர் கூறினார்.
