சென்னை: வங்கக் கடலில் மீன்பிடித்துக் கொண்டிருந்த ராமேஸ்வரம் மீனவர்கள் 23 பேர் இலங்கை கடற்படையினரால் கைது செய்யப்பட்டுள்ளனர். மத்திய அரசு உடனடியாக தலையிட்டு கைது செய்யப்பட்ட தமிழக மீனவர்களை விடுவிக்க நடவடிக்கை எடுக்க வேண்டும் என மார்க்சிஸ்ட் கம்யூனிஸ்ட் கட்சியின் மாநிலச் செயலாளர் கே.பாலகிருஷ்ணன் வலியுறுத்தியுள்ளார்.
அவர் விடுத்துள்ள அறிக்கையில், “வங்கக்கடலில் மீன்பிடித்த ராமேஸ்வரம் மீனவர்கள் 23 பேரை இலங்கை கடற்படையினர் கைது செய்து, அவர்களது படகுகளும் பறிமுதல் செய்யப்பட்டுள்ளன. மீனவர்களுக்கு எதிரான இலங்கை கடற்படையின் தொடர் நடவடிக்கையை மார்க்சிஸ்ட் கம்யூனிஸ்ட் கட்சி வன்மையாக கண்டிக்கிறது.
தமிழ்நாட்டின். 2024-ம் ஆண்டு தொடக்கம் இதுவரை 485 மீனவர்கள் இலங்கை கடற்படையினரால் கைது செய்யப்பட்டுள்ளனர். 65 படகுகள் கைப்பற்றப்பட்டுள்ளன. கைது செய்யப்பட்ட மீனவர்கள் காங்கேசன் கடற்படை துறைமுகத்திற்கு அழைத்துச் செல்லப்பட்டுள்ளதாக தகவல்கள் தெரிவிக்கின்றன. மீனவர்களின் பாதுகாப்பு குறித்து நவம்பர் 6-ம் தேதி நடைபெற்ற இந்திய-இலங்கை கடலோரக் காவல்படை அதிகாரிகளின் கூட்டத்தில் பேசப்பட்டதன் பின்னணியில், நான்கு நாட்களுக்குள் இந்தக் கைதுகள் நடந்திருப்பது பேச்சுக்கும் செயலுக்கும் உள்ள முரண்பாட்டை வெளிப்படுத்துகிறது.
இவ்வாறு கைது செய்யப்படும் மீனவர்களுக்கு இலங்கை நீதிமன்றங்கள் தாங்க முடியாத அபராதம் விதித்து, மாதக்கணக்கில் சிறைவாசம் அனுபவித்து, வாழ்வாதாரத்தை இழந்து அவர்களது குடும்பங்கள் தவிக்கின்றன. எனவே, மத்திய அரசு உடனடியாக தலையிட்டு, கைது செய்யப்பட்ட தமிழக மீனவர்களை விடுவிக்கவும், அவர்களின் படகுகளை ஒப்படைக்கவும், இலங்கை கடற்படையினர் இதுபோன்ற அடாவடித்தனங்களில் ஈடுபடுவதை தடுக்க அரசு அளவில் நடவடிக்கை எடுக்கவும் மார்க்சிஸ்ட் கம்யூனிஸ்ட் மாநில செயற்குழு வலியுறுத்துகிறது.
