மதுரை: சமீப காலமாக ரயில்வேயில் ஏற்பட்டுள்ள பல விபத்துகளுக்கு முக்கிய காரணம், மாநில மொழி தெரியாத ஊழியர்கள் பணியில் இருப்பதுதான் என்று மதுரை மார்க்சிஸ்ட் கம்யூனிஸ்ட் எம்.பி. சு. வெங்கடேசன் தெரிவித்தார். பொது விநியோகத் திட்டத்தில் உள்ள குறைபாடுகள் குறித்து மதுரை மாவட்ட ஆட்சியர் அலுவலகத்தில் மாவட்ட ஆட்சியர் பிரவீன் குமார் தலைமையில் நேற்று ஆலோசனைக் கூட்டம் நடைபெற்றது.
இதில், பொது விநியோகத் திட்டத்தில் உள்ள குறைபாடுகள் குறித்து மதுரை மக்களவை உறுப்பினர் சு. வெங்கடேசன் பொது விநியோகத் துறை அதிகாரிகள் மற்றும் உறுப்பினர்களிடம் கேட்டார். அவர் தொடர்ந்து செய்தியாளர்களிடம் கூறியதாவது:- கடந்த வாரம், தெற்கு ரயில்வேயில் ஊழியர்களின் பதவி உயர்வுக்கான தேர்வு நடத்தப்பட்டது. அதில் ஆங்கிலம், இந்தி மற்றும் மாநில மொழிகள் சேர்க்கப்பட வேண்டும் என்பது அடிப்படை விதி. ஆனால் தெற்கு ரயில்வே நடத்திய அந்த பதவி உயர்வுத் தேர்விற்கான வினாத்தாளில் ஆங்கிலம் மற்றும் இந்தி மட்டுமே இருந்தன. தமிழ் மொழி இல்லை. தேர்வு நடைபெற்று முடிந்துவிட்டது.
இந்தத் தேர்வுக்கு எதிராக ரயில்வே அமைச்சருக்கு ஒரு கடிதம் எழுதியுள்ளேன். இந்தத் தேர்வை உடனடியாக ரத்து செய்ய வேண்டும். வினாத்தாள் தமிழில் தயாரிக்கப்பட்டு மீண்டும் தேர்வு நடத்தப்பட வேண்டும் என்று நான் கோரியுள்ளேன். எனவே, தேர்வை ரத்து செய்யும் முடிவு சில நாட்களில் வெளியாகும் என்று எதிர்பார்க்கிறேன். இதைத் தொடர்ந்து, தெற்கு ரயில்வேயில் நேற்று அடுத்த சுற்றறிக்கை வெளியிடப்பட்டது.
இந்தி மொழியில் பயிற்சி அளித்து தங்கள் ஆளுமையை வளர்த்துக் கொள்ளுமாறு அதிகாரிகளுக்கு அறிவுறுத்தப்பட்டுள்ளது. மொழிப் பிரச்சினை அலுவலகத்துடன் மட்டும் தொடர்புடையது அல்ல. சமீப காலங்களில் ரயில்வேயில் நடந்த பல விபத்துகளுக்கு முக்கிய காரணம், அந்த மாநிலத்தின் மொழி தெரியாத ஊழியர்கள் இருப்பதுதான். இவ்வாறு அவர் கூறினார்.
