ராமேஸ்வரம்: கச்சத்தீவு அருகே மீன்பிடித்துக் கொண்டிருந்த ராமேஸ்வரம் விசைப்படகு மீனவர்களை இலங்கை கடற்படையினர் விரட்டியடித்தனர்.
நேற்று ராமேஸ்வரம் மீன்பிடி துறைமுகத்தில் இருந்து 500க்கும் மேற்பட்ட படகுகளில் 2,500க்கும் மேற்பட்ட மீனவர்கள் மீன் பிடிக்க கடலுக்கு சென்றனர்.
நேற்று காலை கச்சத்தீவு அருகே மீன்பிடித்துக் கொண்டிருந்த போது, அந்த வழியாக ரோந்து வந்த இலங்கை கடற்படையினர், எல்லை தாண்டி வந்து மீன்பிடிக்க வேண்டாம் என எச்சரித்தனர். மேலும், மீனவர்களின் வலைகளை அறுத்து சேதப்படுத்தினர். இலங்கை கடற்படையினரால் அச்சமடைந்த 15 விசைப்படகு மீனவர்கள் மீன் பிடிக்காமல் ஏமாற்றத்துடன் கரை திரும்பினர்.
இலங்கை கடற்படையின் அத்துமீறல்களுக்கு முற்றுப்புள்ளி வைக்க வேண்டும் என ராமேஸ்வரம் மக்கள் வலியுறுத்தியுள்ளனர்.
