திண்டுக்கல்: பழைய ஓய்வூதிய திட்டத்தை மீண்டும் அமல்படுத்த வேண்டும் மற்றும் இடைநிலை ஆசிரியர்களுக்கு மத்திய அரசு ஊதிய கட்டமைப்புடன் சமமான ஊதியம் வழங்க வேண்டும் என வலியுறுத்தி தமிழ்நாடு தொடக்க கல்வி ஆசிரியர் இயக்கங்களின் கூட்டு நடவடிக்கை குழு (டிட்டோ ஜாக்) சார்பில் இன்று திண்டுக்கலில் போராட்டம் நடைபெற்றது.
போராட்டம் திண்டுக்கல் யூனியன் அலுவலகம் அருகிலுள்ள ப்ரஸ் கிளப் முன்பு நடைபெற்றது. இயக்க நிர்வாகிகள் மேடையில் பேசிக் கொண்டிருந்த வேளையில், பல ஆசிரியர்கள் மரத்தடிகளில் நிழல் தேடி அமர்ந்தனர். சிலர் மொபைல் போன்களில் சமூக வலைதளங்களில் ஈடுபட்டதும், சிலர் குழுக்களாக பேசிக் கொண்டதும், சிலர் செல்ஃபி மற்றும் குழுப்புகைப்படங்கள் எடுத்ததும் போராட்டத்திற்கான தீவிரம் குறைவடைந்ததை வெளிக்காட்டியது.
இதேபோல், போராட்டத்தில் கலந்து கொண்டவர்கள் நிர்வாகிகளின் உரைகளில் அதிக கவனம் செலுத்தாததைக் காண முடிந்தது. போராட்டத்தில் உண்மையான ஆர்வம் குறைவாக இருப்பது போன்று உணர்ந்ததாக சிலர் தெரிவித்தனர்.
இந்த மறியல் காரணமாக, யூனியன் சாலை மற்றும் அருகிலுள்ள அரசு அலுவலகங்களில் பணிகளை முடிக்க வந்த பொதுமக்கள் இரண்டு மணி நேரம் அவதிப்பட்டனர். ஆதார் புதுப்பித்தல், அரசு நலத்திட்ட மனுக்கள் உள்ளிட்ட சேவைகளுக்காக வந்தவர்கள் இக்கட்டான சூழ்நிலையில் விரும்பாத தாமதத்தை சந்தித்தனர்.
இந்நிலையில், செப்டம்பர் மாதத்திற்குப் பிறகு பழைய ஓய்வூதிய திட்டம் மீண்டும் செயல்படுத்தப்படலாம் என அரசியல் வட்டாரங்களில் தகவல்கள் பரவி வருவதால், ஆசிரியர் மற்றும் அரசு ஊழியர் அமைப்புகள் போராட்டத்தை மேலும் தீவிரமாக்க திட்டமிட்டுள்ளன.
