சென்னை: பாட்டாளி மக்கள் கட்சியின் பொதுக்குழுவை பிரம்மாண்டமாக நடத்தி முடித்துள்ளார் அன்புமணி. அதே நேரத்தில் வன்னியர் சங்க மகளிர் பெருவிழா மாநாட்டை ராமதாஸ் வெற்றிகரமாக நடத்தியுள்ளார். இரு தரப்பும் தீவிரமாக நடவடிக்கைகளை முன்னெடுத்து வரும் நிலையில் இறுதி வெற்றி யாருக்கு என்ற கேள்வி கட்சி வட்டாரங்களில் எழுந்துள்ளது. கட்சியின் உள்துறை சண்டை தற்போது அதிகரித்து அரசியல் பரப்பில் பேசப்படும் முக்கிய பிரச்னையாக மாறியுள்ளது.
பாமகவில் தந்தை மகன் இடையேயான மோதல் உச்சக்கட்டத்தை எட்டியுள்ளது. கட்சியின் நிறுவனர் ராமதாஸ், தலைவராக இருந்த தனது மகன் அன்புமணியை நீக்குவதாக அறிவித்ததோடு, அவரை செயல் தலைவராக நியமித்து, கூட்டணி முடிவுகளை நான் எடுப்பேன் என்று வலியுறுத்தினார். இதை அடுத்து பல்வேறு நிகழ்வுகள் தொடர்ந்து அரங்கேறி வருகின்றன. இருதரப்பினரும் தங்களது ஆதரவாளர்களை ஒருங்கிணைத்து சக்தி சோதனையில் ஈடுபட்டு வருகின்றனர்.
அன்புமணி ஆதரவாளர்களான பொதுச் செயலாளர் வடிவேல் இராவணன், பொருளாளர் திலகபாமா, வழக்கறிஞர் பேரவை பாலு உள்ளிட்டோரை ராமதாஸ் நீக்கியதாக அறிவித்தார். ஆனால் அவர்கள் அனைவரும் பதவியில் தொடருவார்கள் என அன்புமணி தெளிவுபடுத்தினார். பின்னர் 150-க்கும் மேற்பட்ட மாவட்ட செயலாளர்கள், மாவட்ட தலைவர்கள், நிர்வாகிகள், வன்னியர் சங்க நிர்வாகிகள் நீக்கப்பட்டதாக ராமதாஸ் அறிவித்தார். அதேசமயம் அந்த பதவிகளுக்கு புதிய நிர்வாகிகளையும் நியமித்தார்.
ஆனால் பொதுக்குழுவால் தேர்ந்தெடுக்கப்பட்ட தலைவர் நான்தான், நான் நியமித்த நிர்வாகிகள் அனைவரும் தொடர்வார்கள் என அன்புமணி அறிவித்தார். இதைத் தொடர்ந்து தேர்தல் ஆணையத்தில் முறையிட்ட அன்புமணி, பொதுக்குழு கூட்டத் தேதியை அறிவித்தார். இரு தரப்பினரின் நடவடிக்கைகள் பாமக அரசியல் எதிர்காலத்தை தீர்மானிக்கும் நிலையில் உள்ளன.
