திருவாரூர்: திருவாரூர் மாவட்டத்தில் நேற்று இரவு முதல் தொடர் மழை பெய்து வருகிறது. எனவே மாவட்டத்தில் உள்ள பள்ளி, கல்லூரிகளுக்கு இன்று விடுமுறை அறிவித்து மாவட்ட ஆட்சியர் சாருஸ்ரீ உத்தரவிட்டுள்ளார். தென்மேற்கு வங்கக்கடல் மற்றும் மன்னார் வளைகுடா பகுதிகளில் வளிமண்டலத்தில் குறைந்த சுழற்சி நிலவுகிறது.
இதன் காரணமாக தமிழக கடலோர பகுதிகளில் மழை பெய்து வருகிறது. இந்நிலையில், நேற்று முன்தினம் முதல் சென்னை மற்றும் புறநகர் பகுதிகளில் மழை பெய்தது. இன்றும் மழை பெய்து வருகிறது. சென்னையில் நவம்பர் 13-ம் தேதி வரை கனமழை பெய்ய வாய்ப்புள்ளதாக வானிலை ஆய்வு மையம் அறிவித்துள்ளது. இதேபோல் இன்று திருவாரூர் உள்ளிட்ட 13 மாவட்டங்களுக்கு கனமழை எச்சரிக்கையை சென்னை வானிலை ஆய்வு மையம் விடுத்துள்ளது.
மேலும், திருவாரூரில் இன்று காலை 10 மணி வரை மஞ்சள் அலர்ட் விடுக்கப்பட்டுள்ளது. இந்நிலையில், கனமழை காரணமாக திருவாரூரில் இன்று பள்ளி, கல்லூரிகளுக்கு விடுமுறை அளிக்கப்பட்டுள்ளது.
