குலசேகரம்: திற்பரப்பு அருவி குமரி மாவட்டத்தில் உள்ள புகழ்பெற்ற சுற்றுலா தலங்களில் ஒன்றாகும். விடுமுறை நாட்களில் இங்கு சுற்றுலாப் பயணிகளின் வருகை அதிகமாக இருப்பதைக் காணலாம். தற்போது பக்ரீத் பண்டிகை விடுமுறை மற்றும் நேற்று ஒரு வார விடுமுறை என்பதால், திற்பரப்பு அருவியில் ஏராளமான சுற்றுலாப் பயணிகள் குவிந்தனர். இதற்கிடையில், கோடை விடுமுறைக்குப் பிறகு இன்று முதல் பெரும்பாலான தனியார் பள்ளிகள் திறக்கப்படுகின்றன.
இதன் காரணமாக, நேற்று மாலை சுற்றுலாப் பயணிகளின் எண்ணிக்கை வழக்கத்திற்கு மாறாக அதிகரித்தது. கார்கள் உள்ளிட்ட வாகனங்களில் பலர் வந்திருந்தனர். இதனால், திற்பரப்பு அருவிக்கு செல்லும் சாலையில் கடும் போக்குவரத்து நெரிசல் ஏற்பட்டது. சுமார் 1 கி.மீ. தூரம் வாகனங்கள் நிறுத்தப்பட்டன. இதனால், சுற்றுலாப் பயணிகள் அவதிப்பட்டனர். போக்குவரத்தை ஒழுங்குபடுத்தும் பணியில் போலீசார் ஈடுபட்டனர்.
அருவியில் இருந்து பீறிட்டு வரும் நீரில் அவர்கள் மகிழ்ச்சியுடன் குளித்தனர். இதேபோல், அருவியின் மேல் பகுதியில் உள்ள தடுப்பணைப் பகுதியிலும் கூட்டம் அதிகமாக காணப்பட்டது. அவர்கள் அங்கு படகு சவாரி செய்து கோதையாற்றின் இயற்கை அழகை ரசித்தனர். திற்பரப்பு அருவியிலும், மேல் பகுதியில் உள்ள தடுப்பணையிலும் எந்தவித அசம்பாவித சம்பவங்களும் நடைபெறாமல் தடுக்க திற்பரப்பு போலீசார் பாதுகாப்புப் பணியில் ஈடுபட்டிருந்தனர்.
