குன்னூர் : தொடர் விடுமுறையால் சுற்றுலா பயணிகள் வருகை அதிகரித்துள்ளதால், குன்னூரில் சுற்றுலா பயணிகளின் வருகை அதிகரித்துள்ளது. தமிழகத்தில் தற்போது அரையாண்டு தேர்வு விடுமுறை மற்றும் கிறிஸ்துமஸ் பண்டிகையை முன்னிட்டு பள்ளிகளுக்கு விடுமுறை விடப்பட்டுள்ளதால், நீலகிரி மாவட்டம் குன்னூரில் உள்ள சுற்றுலா தலங்களுக்கு சுற்றுலா பயணிகளின் எண்ணிக்கை அதிகரித்து வருகிறது.
குறிப்பாக குன்னூரில் உள்ள சிம்ஸ் பூங்கா, காட்டேரி பூங்கா, டால்பின் நோஸ், லாம்ஸ் ராக் போன்ற பகுதிகளில் சுற்றுலா பயணிகளின் வருகை அதிகரித்துள்ளது. பூங்காக்களில் வண்ண வண்ண மலர்களைக் கண்டு மகிழ்ந்த சுற்றுலாப் பயணிகள், குடும்பத்துடன் செல்பி, புகைப்படம் எடுத்து மகிழ்ச்சியை வெளிப்படுத்தி வருகின்றனர். சிம்ஸ் பூங்காவில் உள்ள படகு இல்லத்தில் உற்சாகமான படகு சவாரியும் மேற்கொண்டு வருகின்றனர்.
ஆனால், தற்போது குன்னூரில் வானம் மேகமூட்டத்துடன் காணப்படுவதால் இயற்கை எழில் கொஞ்சும் டால்பின் நோஸ், லாம்ஸ் ராக் போன்ற பகுதிகளுக்கு செல்லும் சுற்றுலா பயணிகள் இயற்கையை ரசிக்க முடியாமல் வீடு திரும்ப வேண்டிய நிலை உள்ளது. மேலும் குன்னூர் நகரின் முக்கிய சாலைகளான குன்னூர்-மேட்டுப்பாளையம், குன்னூர்-ஊட்டி, குன்னூர்-கோத்தகிரி, குன்னூர்-ஆடர்லி போன்ற முக்கிய சாலைகளில் சுற்றுலா வாகனங்களால் அடிக்கடி போக்குவரத்து நெரிசல் ஏற்படுகிறது.
மேலும், உணவகங்கள், ஓட்டல்களில் மக்கள் கூட்டம் அலைமோதுகிறது. ஓட்டல்கள், ஓட்டல்கள் முன்பு சாலையோரங்களில் வாகனங்கள் நிறுத்தப்படுவதால், அவ்வப்போது போக்குவரத்து நெரிசல் ஏற்படுகிறது. இதை தவிர்க்க போக்குவரத்து போலீசார் சுற்றுலா பயணிகளின் வாகனங்களை கண்காணிக்கும் பணியில் ஈடுபட்டுள்ளனர். சுற்றுலா பயணிகளின் வருகை அதிகரித்துள்ளதால், அனைத்து சுற்றுலா தலங்கள் மற்றும் கடை வீதிகள் சுற்றுலா பயணிகளால் நிரம்பி வழிகின்றன. சுற்றுலா பயணிகளின் வருகை பல மடங்கு அதிகரித்துள்ளதால், கடைக்காரர்கள் மகிழ்ச்சியடைந்துள்ளனர்.
