ஏலகிரி: திருப்பத்தூர் மாவட்டம் ஜோலார்பேட்டை அருகே உள்ள ஏலகிரி மலை, கடல் மட்டத்திலிருந்து 1,200 மீட்டர் உயரத்தில், அமைதியான சூழலில் 4 மலைகளால் சூழப்பட்டுள்ளது. ஏலகிரி மலை ஏழைகளின் ஊட்டி என்றும், மலைகளின் இளவரசி என்றும் அழைக்கப்படுகிறது. ஊட்டி, கொடைக்கானல், ஏற்காடு போன்ற சிறந்த சுற்றுலாத் தலமாக இருப்பதால், தமிழகத்தின் பல்வேறு பகுதிகளிலிருந்தும், கர்நாடகா, கேரளா, ஆந்திரா, புதுச்சேரி போன்ற அண்டை மாநிலங்களிலிருந்தும் ஏராளமான சுற்றுலாப் பயணிகள் ஏலகிரி மலைக்கு வருகை தருகின்றனர்.
சுற்றுலாப் பயணிகளின் எண்ணிக்கை நாளுக்கு நாள் அதிகரித்து வருவதால், சுற்றுலா தலத்தை மேம்படுத்த அரசு பல்வேறு திட்டங்களை செயல்படுத்தியுள்ளது. இந்த சூழ்நிலையில், பள்ளிகள் மற்றும் கல்லூரிகளுக்கு கோடை விடுமுறை காரணமாக ஏலகிரி மலையில் கடந்த மாதம் வழக்கத்தை விட கூட்டம் அதிகரித்துள்ளது. இதையடுத்து, ஞாயிற்றுக்கிழமை விடுமுறை நாளான நேற்று சுற்றுலாப் பயணிகளின் வருகை அதிகமாக இருந்தது.
அதைத் தொடர்ந்து, அங்குள்ள படகு இல்லத்தில் குடும்பத்தினர் மற்றும் நண்பர்களுடன் படகு சவாரி செய்து மகிழ்ந்தனர். நிலாவூர் பண்டோரா பறவைகள் சரணாலயத்தில் உள்ள பறவைகளுக்கு உணவளித்து மகிழ்ந்தனர். அங்கு பராமரிக்கப்படும் வெளிநாட்டுப் பறவைகள், தீக்கோழிகள், கோழிகள், முயல்கள், அரிய வகை குரங்குகள் மற்றும் மீன்களைப் பார்த்து அவர்கள் மகிழ்ச்சியடைந்தனர்.
