பல்லடம்: வசூல் வேட்டையால் வாக்குவாதம்… திரை பிரபலங்கள் கைகளால் விருது வழங்குவதாக கூறி வசூல் வேட்டை நடத்திய நிகழ்ச்சி ஏற்பாட்டாளர்கள், விருது வாங்க வந்தோர் மத்தியில் வாக்குவாதம் ஏற்பட்டதாக தகவல்கள் வெளியாகி உள்ளது.
பல்லடம் அருகே, கடந்த ஞாயிற்றுகிழமை நடிகர்கள் பாக்கியராஜ், சதீஷ், பாலா ஆகியோர் கலந்துகொண்ட விருது வழங்கும் விழாவில் நடந்த குளறுபடிகளால், நிகழ்ச்சி ஏற்பாட்டாளர்களுக்கும், விருது வாங்க வந்தோருக்கும் இடையே வாக்குவாதம் ஏற்பட்டுள்ளது என்று தெரிய வந்துள்ளது.
திரை நட்சத்திரங்கள் கைகளால் விருது வழங்குவதாக கூறி, சமூக ஆர்வலர்கள், தன்னார்வலர்கள், யூடியூபர்களிடமிருந்து 2000 ரூபாய் முதல் 4000 ரூபாய் வரை நிகழ்ச்சி ஏற்பாட்டாளர்களால் வசூலிக்கப்பட்டதாக கூறப்படுகிறது.
எவ்வித திட்டமிடலும் இல்லாமல் விழா நடத்தப்பட்டதால் திரை பிரபலங்கள் பாதியிலேயே கிளம்பிய நிலையில், விருதுகளை மேடையில் கொட்டி வைத்து, நிகழ்ச்சி ஏற்பாட்டாளர்களே அவற்றை வழங்கியதாக சொல்லப்படுகிறது.
திரைப்பிரபலங்கள் கையால் விருது வாங்கலாம் என எதிர்பார்த்து பணம் செலுத்தி ஏமாந்துபோனதாக விருது வாங்க வந்தவர்கள் தெரிவித்து நிகழ்ச்சி ஏற்பாட்டாளர்களுடன் வாக்குவாதம் செய்துள்ளனர். இதுகுறித்து தற்போது வெளியில் தெரிய வந்து சலசலப்பை ஏற்படுத்தி உள்ளது.
